आलियाला पुरस्कार आणि महेश भट्टांच्या उड्या!

अविनाश लोहाना । मुंबई मिरर

अभिनेत्री आलिया भट्टला जिओ फिल्मफेअर पुरस्कार सोहळ्यात सर्वोत्कृष्ट अभिनेत्रीचा पुरस्कार मिळाल्यानंतर रविवारी दुपारी तिचे वडिल दिग्दर्शक महेश भट्ट यांनी फेसबुकवर त्यांच्या लाडक्या लेकीचे छायाचित्र पोस्ट केले. फिल्मफेअरची काळी बाहुली हातात घेतलेल्या आलियाच्या छायाचित्राशेजारी त्यांनी लिहिले होते - 'जेव्हा तुम्ही भयमुक्त होता तेव्हा आयुष्य अमर्याद होते. माझ्या लिटील बिग गर्लचे अभिनंदन.' महेश भट्ट आलियाच्या पुरस्कारामुळे इतके खूश झाले होते की म्हणे रात्रभर आनंदाने उड्या मारत होते! हे त्यांनीच त्यांच्या कुटुंबाच्या व्हॉट्स अप ग्रुपवर सांगितलेय.

आपल्या २३ वर्षांच्या मुलीचा तिच्या सर्वोत्कृष्ट अभिनयासाठी फिल्मफेअर या प्रतिष्ठित पुरस्काराने गौरव झाल्यावर कोणत्या आई-वडिलांना आनंद होणार नाही? तसाच तो महेश भट्ट, आई सोनी राझदान, बहिणी पूजा आणि शाहिनला झाला. पण तिचा हा गौरव होत असताना मात्र महेश भट्ट सोहळ्याला उपस्थित नव्हते. त्याचे उत्तर त्यांच्याच लेकीने दिले. आलिया म्हणते, 'डॅड कधीच कोणत्या पुरस्कार सोहळ्याला जात नाहीत. त्यांच्या हस्ते त्यांच्या जवळच्या मित्राला पुरस्कार देण्यात येत असेल तर ते जातात.'

महेश भट्ट प्रत्यक्ष या सोहळ्याला नसले तरी मनाने मात्र तिथेच होते. आलियाला पुरस्कार मिळाल्यानंतर तिच्या वडिलांनी मेसेज केला की पुरस्कार स्वीकारल्यानंतरचे तिचे स्पीच त्यांना आवडले. तिला आश्चर्य वाटले की ते त्यांनी कसे ऐकले, तेव्हा त्यांनी तिला सांगितले की त्यांनी आलियाची मॅनेजर ग्रीष्मा हिला सांगून ठेवले होते की जर आलियाला पुरस्कार मिळाला तर तुझा मोबाईल सुरू करुन स्पीकर ऑन ठेव. भट्ट कुटुंबाच्या व्हॉट्स अप ग्रुपवर महेश भट्ट यांनी लिहून ठेवले होते की मी आनंदाच्या भरात रात्रभर कोलांटउड्या मारत होतो. आलियाला हे सांगतानाही हसू आवरत नव्हते!

आलियाला 'उडता पंजाब' मधील अभिनयासाठी हा पुरस्कार मिळाला. यापूर्वी तिला हायवे सिनेमातल्या भूमिकेसाठी सर्वोत्कृष्ट अभिनेत्री क्रिटिक्स अवॉर्ड मिळाला होता.