अमरीश पुरींचा चुलत नातू येतोय मराठी सिनेमात

मटा ऑनलाइन वृत्त । मुंबई

'मोगॅम्बो खुश हुआ...' म्हणत अवघ्या सिनेजगतावर मोहिनी घातलेले व्हिलन अमरीश पुरी यांचा चुलत नातू चक्क मराठी सिनेमातून इंडस्ट्रीत पदार्पण करत आहे. मात्र तो आजोबांप्रमाणे अभिनय करणार नाही तर सिनेमाची निर्मिती करत आहे. अंजनेय साठे असं त्याचं नाव आहे.

अंजनेयची आई म्हणजे अमरीश पुरी यांच्या भावाची मुलगी. हा इतका अभिनयाचा वारसा सोडला तर अंजनेयच्या कुटुंबातले इतर सर्व डॉक्टर आहेत. अनेक म्युझिकल कार्यक्रमांचे मोठ्या प्रमाणावर आयोजन केल्यानंतर अंजनेय आता 'जिंदगी विराट' नावाचा सिनेमा करतोय. 'सिनेमाची निर्मिती करत असताना एक गोष्ट माझ्या डोळ्यासमोर स्पष्ट आहे, ती म्हणजे सिनेमा हा संपूर्ण कुटुंबाला एकत्र बसून बघण्यासारखा हवा. त्यामुळेच हा सिनेमाही कौटुंबिक मनोरंजनपट आहे,' अंजनेय सांगतो.

'जिंदगी विराट' हा सिनेमा वडील-मुलाच्या नात्यावर आधारित आहे. या सिनेमातले कलाकारही तगडे आहेत. किशोर कदम, भाऊ कदम, अतुल परचुरे, उषा नाईक यांची सिनेमात भूमिका आहे. सुमीत संघमित्राने या सिनेमाचं दिग्दर्शन केलंय तर सुरज-धीरज यांनी संगीत दिलंय. सोनू निगम, श्रेया घोषाल, विशाल दादलानी, जावेद अली यांनी गाणी गायली आहेत, जी व्हायरल झाली आहेत. हा सिनेमा २९ सप्टेंबर रोजी प्रदर्शित होत आहे.