सलमानपुढे अरिजीतचे 'फेसबुक'वर लोटांगण!

मटा ऑनलाइन वृत्त । मुंबई

आपल्या गोड गळ्याने तरुणाईच्या गळ्यातील ताईत बनलेला सध्याचा आघाडीचा पार्श्वगायक अरिजीत सिंग आणि अभिनेता सलमान खान यांच्यातील वाद गेल्या काही दिवसांपासून चर्चेत असतानाच अरिजीतने अचानक सलमानपुढे लोटांगण घातले आहे. फेसबुक पोस्टच्या माध्यमातून सलमानची जाहीर माफी मागताना 'सुलतान' चित्रपटात मी गायलेले गाणे कृपा करुन वगळू नकोस, अशी कळकळीची विनंतीच अरिजीतने केली आहे.

'आशिकी-२' या चित्रपटातील 'तुम ही हो' हे अरिजीतचे गाणे प्रचंड गाजले होते. मात्र, या गाण्यावरूनच सलमान आणि अरिजीत यांच्यात वादाची ठिणगी पडली होती. 'गील्ड' पुरस्कार सोहळ्यात अरिजीतला या गाण्यासाठी सर्वोत्कृष्ट पार्श्वगायनाचा पुरस्कार मिळाला. हा पुरस्कार स्वीकारण्यासाठी व्यासपीठावर आलेल्या अरिजीतने 'आप लोगोने तो सुला दिया यार', अशी टिपण्णी केली होती. त्यानंतर सलमाननेही 'तुम ही हो' या गाण्याची नक्कल करुन हे गाणे ऐकताना झोप येते, असा टोला लगावला होता. हा सगळा प्रकार थट्टा-मस्करीत घडला होता. मात्र, अरिजीतने आपल्या सूत्रसंचालनाची खिल्ली उडवली असे वाटून सलमानने त्याच्यावर राग धरला. विशेष म्हणजे सलमान अरिजीतच्या गाण्यांचाही तिरस्कार करू लागला. सलमानच्या 'किक' चित्रपटात अरिजीतने एक गाणे गायले होते मात्र सलमानने ते हटवायला लावले. आता सलमानचा 'सुलतान' चित्रपट येत असून या चित्रपटातही एक गाणे अरिजीत गायला आहे. पण हे गाणे सलमानच्या दबावामुळे काढले जाण्याची भीती अरिजीतला असून त्यातूनच त्याने 'फेसबुक'चे माध्यम निवडत थेट सलमानची माफी मागितली आहे.

'त्या' कार्यक्रमात जे काही घडले त्याने आपला अपमान झाला असे वाटत असेल तर मी त्याबद्दल माफी मागतो. याआधी मी अनेकदा आपली माफी मागण्याचा प्रयत्न केला. टेक्स्ट मेसेज पाठवले. पण त्याला कोणताच प्रतिसाद मिळाला नाही. त्यामुळे फेसबुकवर सगळ्यांसमोर मी दिलगिरी व्यक्त करत आहे. तुम्हाला एवढीच विनंती आहे की, 'सुलतान'मध्ये मी जे गाणे गायले आहे ते गाणे कृपा करुन त्यातून हटवू नका. हवेतर हे गाणे अन्य गायकाकडून गाऊन घ्या पण गाण्यावर अन्याय करू नका. मी अनेक गाणी गायली आहेत पण तुमच्यासाठी गायलेले एखादेतरी गाणे माझ्या संग्रही असावे, अशी माझी मनापासून इच्छा आहे, असे अरिजीतने या पोस्टमध्ये नमूद केले आहे. मी आणि माझे कुटुंबीय फार पूर्वीपासून तुमचे फॅन आहोत, असेही अरिजीत या पोस्टमध्ये म्हणतो. विशेष म्हणजे काही तासांतच अरिजीतने ही पोस्ट डिलीट केली. त्यानंतर एक नवी पोस्ट टाकून त्यात माझे म्हणणे आपल्यापर्यंत पोहोचले असेलच, अशी आशा आहे. शेवटी हे सगळे माझ्यावरच उलटणार आहे, याचीही मला कल्पना आहे, असे अरिजीतने नमूद केले आहे.

दरम्यान, सलमानकडून मात्र यावर कोणतीही प्रतिक्रिया अद्याप आलेली नाही.