'मणिकर्णिका..'त अतुल साकारणार तात्या टोपे

मटा ऑनलाइन वृत्त । मुंबई

अभिनेत्री कंगना राणावत हिच्या 'मणिकर्णिका - द क्वीन ऑफ झांशी' सिनेमाचं शूटिंग जेव्हापासून सुरू झालंय तेव्हापासून हा सिनेमा काही ना काही कारणाने चर्चेत आहे. आता असं कळतंय की मराठी सिनेसृष्टीतला अभिनेता अतुल कुलकर्णी या सिनेमात तात्या टोपेची भूमिका साकारणार आहे.

हा सिनेमा झाशीची राणी लक्ष्मीबाई यांच्या आयुष्यावर आधारित आहे. अतुल कुलकर्णीची भूमिका कंगनानंतर या सिनेमात सर्वात महत्त्वाची असेल असंही सांगण्यात येतंय. तात्या टोपेंचं खरं नाव होतं रामचंद्र पांडुरंग टोपे. १८५७ च्या स्वातंत्र्य संग्रामाचं नेतृत्व करणाऱ्या क्रांतिकारकांपैकी ते एक होते. इंग्रजांच्या ताब्यातून ग्वाल्हेरची सुटका करण्यासाठी राणी लक्ष्मीबाईंना तात्या टोपेंनी मदत केली होती.

अतुल कुलकर्णीने याआधी 'रंग दे बसंती' सिनेमात क्रांतिकारक राम प्रसाद बिस्मिल यांची भूमिका निभावली होती. 'मणिकर्णिका' तील भूमिकेबाबत अतुल कुलकर्णी यानं सांगितलं की इतकी चांगली भूमिका त्याला यापूर्वी सिनेमात मिळाली नव्हती. सिनेमातले तलवारबाजीचे सर्व स्टंट्सही त्यानेच केले आहेत.