'बाहुबली'तील अभिनेत्रीने त्याला लगावली थप्पड

मटा ऑनलाइन वृत्त। मुंबई

'बाहुबली: द बिगिनिंग', 'आर राजकुमार' आणि 'शांघाई' अशा चित्रपटांसह दाक्षिणात्य चित्रपटांमध्ये आयटम नंबर करणारी मॉडेल, अभिनेत्री आणि नृत्यांगना स्कारलेट मेलिश विल्सनशी 'हंसा एक संयोग' या चित्रपटाच्या सेटवर तिचा सहकलाकार उमाकांत रायने अश्लील चाळे आणि गैरवर्तन केल्याचा प्रकार केल्याचं उघड झालंय. अभिनेत्री स्कारलेटनं मात्र आपल्या या सहकलाकाराला थेट श्रीमुखात लगावत या गैरवर्तनाचं जोरदार प्रत्युत्तर दिलं.

'हंसा एक संयोग'च्या सेटवर उपस्थित सूत्रानं घडलेल्या प्रकाराबाबत दिलेल्या माहितीनुसार, या चित्रपटातील एक आयटम नंबर 'सेल्फी कुडी'चं चित्रिकरण सुरू होतं. या गाण्यासाठी स्कारलेटचे एकटीचेच शॉट्स घेण्याचं काम सुरू होतं. त्यावेळी या चित्रपटातील एक कलाकार अभिनेता उमाकांत रायनं स्कारलेटच्या केसांना विचित्र पद्धतीनं स्पर्श केला. इतकंच नव्हे तर, त्यानं तिच्याकडे पाहून अश्लील इशारे करत तिच्यासोबत गैरवर्तनही केलं. उमाकांतचा हा पवित्रा पाहून स्कारलेट सुरूवातीला काहीशी घाबरली, मात्र तिनं त्वरित स्वत:ला सावरलं आणि उमाकांतच्या गालात थेट थप्पडच लगावली.

'नवभारत टाइम्स'शी बोलताना या चित्रपटाचे निर्माते सुरेश शर्मा यांनी घडलेल्या प्रकाराबाबत खेद व्यक्त केलाय. सिनेमाच्या सेटवर घडलेला प्रकार आम्ही कदापि सहन करणार नाही अशी प्रतिक्रिया व्यक्त करत शर्मा अभिनेता उमाकांच रायला चित्रपटातून काढून टाकल्याचा निर्णय घेतला आहे. मात्र. जर उमाकांतनं घडलेल्या प्रकाराबाबत माफी मागितली आणि स्कारलेटनं त्याला माफ केलं तर, पुढं काय करायचं ते पाहू अशी भूमिका शर्मा यांनी घेतली आहे. सध्या मात्र उमाकांतला शूटिंगची परवानगी नाकारण्यात आलीय. इतकंच नाही तर, 'फिल्म फेडरेशन ऑफ इंडिया'कडे घडलेल्या प्रकाराबाबत उमाकांतची तक्रार करण्यात येणार असल्याचंही शर्मा म्हणाले.

'हंसा एक संयोग' हा चित्रपट तृतियपंथीयांच्या जीवनावर आधारित आहे. समाजात तृतियपंथीयांशी होत असलेल्या व्यवहारांबाबत काही प्रश्न उपस्थित करण्यात आलेत. या चित्रपटात शरद सक्सेना, श्रेया जी शिंदे, अखिलेंद्र मिश्रा, अमन वर्मा आणि दीपशिखा यांच्या महत्त्वाच्या भूमिका आहेत.

नृत्यांगना आणि अभिनेत्री स्कारलेटनं हिंदी चित्रपटांसह तामिळ, तेलुगू, कन्नड भाषेतील सुमारे डझनाहून अधिक चित्रपटांमध्ये आयटम नंबर केले आहेत. स्कारलेट अभिनेता अक्षय कुमारचा आगामी चित्रपट 'गोल्ड'मध्येही दिसणार आहे.