'बजरंगी भाईजान' फेम अभिनेत्री जेलमध्ये

मटा ऑनलाइन वृत्त । जालंधर

अभिनेता सलमान खानच्या 'बजरंगी भाईजान' चित्रपटात करीना कपूरच्या आईची भूमिका साकारणारी अभिनेत्री अलका कौशल आणि तिची आई सुशीला बडोला या दोघांना आर्थिक फसवणूक केल्याप्रकरणी दोन वर्षांची शिक्षा ठोठावण्यात आली आहे.

अलका आणि तिच्या आईने जालंधरमधील एका गावातील अवतार सिंग नावाच्या ओळखीतल्या शेतकऱ्याकडून ५० लाख रुपये उधार घेतले होते. मालिका बनवायची आहे, असे कारण देऊन हे पैसे या दोघांनी घेतले होते. दरम्यान, अवतारने हे पैसे परत मागितले असता त्याला २५-२५ लाखांचे दोन चेक देण्यात आले. मात्र हे दोनही चेक बाउंस झाल्याने अवतारने मलेरकोटला कोर्टात धाव घेतली. अलका आणि तिच्या आईने अर्थिक फसवणूक केल्याप्रकरणी त्याने कोर्टात दाद मागितली.

याप्रकरणी अवतारची फसवणूक झाल्याचे सबळ पुरावे असल्याने कोर्टाने अलका व तिच्या आईला २०१५ मध्येच दोन वर्षांची शिक्षा ठोठावली होती. मात्र, त्यानंतर या निकालाला संगरूर कोर्टात आव्हान देण्यात आले होते. याप्रकरणी आता संगरूर कोर्टाने निर्णय दिला असून मलेरकोटला कोर्टाचा निकाल कायम ठेवण्यात आला आहे. या निकालानंतर अलका आणि तिच्या आईची जेलमध्ये रवानगी करण्यात आली आहे.

दरम्यान, अलका कौशलने 'क्वीन' चित्रपटात कंगना राणावतच्या आईची भूमिका साकारली होती. स्वरागिनी, कुबूल है यासह अनेक मालिकांमध्येही तिने भूमिका साकारलेल्या आहेत.