भाचीच्या ग्रीटिंग कार्डचं अप्रूप

'असंभव', 'पिंजरा' यासारख्या एकाहून एक सरस मालिका, 'वन रूम किचन', 'संदूक' या यासारख्या दर्जेदार सिनेमांमधून प्रेक्षकांच्या गळ्यातील ताईत बनलेल्या भार्गवी चिरमुले या गुणी अभिनेत्रीचा आज वाढदिवस आहे. सेटवर साजरा केलेला वाढदिवस असो की आईच्या हातची बासुंदी-पुरी, वाढदिवसाच्या गोड आठवणी तिनं 'मुंटा' वाचकांशी शेअर केल्या आहेत.

एखाद्या कलाकारासाठी त्याचा वाढदिवस प्रयोगाच्या ठिकाणी किंवा मालिकेच्या सेटवर सर्वांसोबत साजरा होणं, यापेक्षा दुसरा मोठा आनंद कदाचित नाहीच! माझंही अगदी तसंच आहे. कारण याआधी अनेक मालिका, रिअॅलिटी शो करताना सहकलाकारांसोबत किंवा अनेक दिग्गज रंगकर्मींसोबत सेटवर किंवा रंगभूमीवर वाढदिवस साजरे झाले आहेत. ते प्रत्येक सेलिब्रेशन माझ्यासाठी अविस्मरणीय ठरलं आहे. यापलीकडे घरी म्हणाल तर लहानपणी माझा वाढदिवस म्हणजे सोहळाच! खरं तर तुम्हाला सर्वांना वाचून आश्चर्य वाटेल, पण आमच्या घरी लहानपणापासून तिथीनुसार वाढदिवस साजरा करण्याची पद्धत आहे. त्यामुळे माझा वाढदिवस रंगपंचमीला साजरा व्हायचा. सकाळी आत्या, काका-काकू आले की, औक्षण करायचे आणि मग दुपारच्या जेवणाला माझ्या आवडीचं म्हणून बासुंदी-पुरीचा बेत असायचा. मी शाकाहारी असल्यानं माझ्या आवडीचे खास व्हेज मेन्यू असायचे. वाढदिवशी आईच्या हातची बासुंदी म्हणजे माझ्यासाठी जणू दुग्धशर्करा योगच! माझ्या वाढदिवसाची अजून एक खास आठवण म्हणजे चार-पाच वर्षांपूर्वी नर्सरीत शिकत असलेल्या माझ्या भाचीनं माझ्यासाठी एक जुना फोटो वापरून खास ग्रीटिंग कार्ड बनवलं होतं. इतक्या कोवळ्या वयात तिनं फोटोचा वापर करून बनवलेलं कार्ड माझ्यासाठी खूप खास आहे. ते आजही मी माझ्याजवळ जपून ठेवलंय.

शब्दांकन- प्रथमेश राणे