प्रत्यक्षात आईपण अनुभवलं नसलं, तरी अनेक अभिनेत्रींना पडद्यावर आईची भूमिका निभवायची असते. रिल लाइफमध्ये त्या छोट्यांशी त्यांची छान गट्टी जमते. अशाच काही अभिनेत्रींनी त्यांचं हे गोड बाँडिंग, उद्याच्या 'मदर्स डे'निमित्त शेअर केलं आहे...
चिमुकल्याचं मन जपते
मालिकेत माझा मुलगा दाखवलेला अथर्व खऱ्या आयुष्यात खूप चंचल आहे. आम्हाला त्याला कशात तरी गुंतवून ठेवावं लागतं. पण, अत्यंत लाघवी आहे तो. आम्ही मस्ती करतो आणि भांडतोही. तो सेटवर आला की, पहिले 'राधिका आई' म्हणत मला शोधत असतो. एका चिमुकल्याचं मन मी जपू शकले, ही माझ्यासाठी मोठी गोष्ट आहे.
अनिता दाते, अभिनेत्री
सेटवर धमाल
मालिकेत परीची भूमिका साकारणारी मुलगी नुकतीच बदलली आहे. पहिल्या परीसोबत आम्ही खूप धमाल करायचो. आणि आता नव्या परीसोबतही आम्ही खूप मजा करतो. मुळात लहान मुलांची आवड असल्यामुळे माझी छोट्यांशी लगेच गट्टी जमते. परी आणि माझी तशी चांगलीच गट्टी जमलीय. सेटवर पोहोचल्यावर सगळ्यात आधी आम्ही एकमेकींना शोधत असतो.
नुपूर परुळेकर, अभिनेत्री
बेस्ट फ्रेंड्स
ईशाची भूमिका करणारी हवी तशी मुलगी आम्हाला मिळतच नव्हती. पुढे सोलापूरला एका कार्यक्रमाच्या वेळी आम्हाला गार्गी भेटली. तिथंच मला ती एवढी आवडली, की आम्ही तिला ईशाची भूमिका दिली. पाहताच क्षणी कुणाही प्रेमात पडले अशी ती आहे. ती खूप समजूतदारही आहे. आम्ही एकमेकींच्या बेस्ट फ्रेंड झालो आहोत.
मयुरी देशमुख, अभिनेत्री
लळा लागला
'लव्ह लग्न लोचा' मालिकेत माझी मुलगी अगदी सहा महिन्यांची दाखवली होती. त्या इवल्याशा बाळाला घेऊन मला शूट करता येईल का अशी शंका आधी मला वाटत होती. नंतर, तिचा एवढा लळा लागला की, शूटिंग संपल्यानंतर मी तिला घरी सोडायला जायचे. शूटच्या शेवटच्या दिवशी तिला घरी सोडायला जाण्यासाठी मी जेव्हा रिक्षात बसले तेव्हा ती माझ्या मांडीवरच झोपली. तिचा निरोप घेताना खूप भरुन आलं होतं.
सिद्धी कारखानीस, अभिनेत्री