शिवरायांचा टॅटू काढताना कोणता विचार होता? आस्तादच्या उत्तरानं जिंकली शिवप्रेमींची मनं

मुंबई: गेल्या काही दिवसांपासून छत्रपती शिवाजी महाराज यांच्याविषयी अवमानकारक विधानं राजकीय नेत्यांकडून केली जात आहेत, त्यामुळं सर्व स्तरातून संताप व्यक्त केला जात आहे. या दरम्यान, एका मराठी अभिनेत्यानं त्याच्या दंडावर काढलेला शिवरायांचा टॅटू चर्चेचा विषय ठरत आहे.

मराठी अभिनेता आस्ताद काळे यानं त्याच्या उजव्या हातावरील दंडावर छत्रपती शिवाजी महाराज यांचा टॅटू गोंदवला आहे. हा टॅटू त्यानं काही महिन्यांपूर्वीच गोंदवला आहे. त्याचा व्हिडिओ देखील त्यानं काही महिन्यांपूर्वी शेअर केला होता. त्याचा हा व्हिडिओ सध्या चर्चेत आलाय.

नुकत्याच दिलेल्या मुलाखतीत त्यानं या टॅटूबद्दल भाष्य केलंय. हा टॅटू काढण्यामागं नेमका काय विचार होता हे विचारल्यावर, त्यानं दिलेलं उत्तर चाहत्यांचं आणि शिवप्रेमींचं मन जिंकत आहे. आईविषयी प्रेम असायला कोणता विचार करायला लागत नाही ना...तसंच आहे हे...विचार काय असणार हे होते म्हणून मी आहे', असं उस्तादनं म्हटलं आहे.

टॅटूचं डिझाइन ऑनलाइन पाहिलं होतं, त्यानंतर त्यात काही बदल केल्याचंही आस्तादनं सांगितलं. शिवरायांचा चेहरा आणि त्यामागं फडकणारा भगवा झेंडा , असा हा सुरेख टॅटू सगळ्यांचं लक्ष वेधून घेत आहे.