ही भूमिका तुझ्यासाठी... 'वेडात मराठे'चं पोस्टर शेअर करत आदर्श शिंदेने केलं भाऊ उत्कर्षचं कौतुक

मुंबई- लोकप्रिय दिग्दर्शक महेश मांजरेकर यांच्या 'वेडात मराठे वीर दौडले सात' या चित्रपटाची नुकतीच घोषणा करण्यात आली. बॉलिवूड अभिनेता अक्षय कुमार या चित्रपटात छत्रपती शिवाजी महाराजांची भूमिका साकारणार आहे. तर 'बिग बॉस मराठी ३' मधील तीन स्पर्धक चित्रपटात मुख्य भूमिकेत झळकत आहेत. त्यात लोकप्रिय गायक आदर्श शिंदे याचा भाऊ उत्कर्ष शिंदे याचाही समावेश आहे. उत्कर्ष चित्रपटात सूर्याजी दांडकर यांची भूमिका साकारणार आहे. त्यामुळे आदर्शने नुकतीच एक पोस्ट करत आपल्या भावाचं कौतुक केलं आहे.

आदर्शने चित्रपटाचं पोस्टर नेटकऱ्यांसोबत शेअर करत लिहिलं, 'हे पोस्टर शेअर करताना खूप आनंद होतोय. पोस्टर रिलीज होऊन वेळ झाला पण मी आज शेअर करतोय. उत्कर्ष आनंद शिंदे ही भुमिका साकारण्यासाठी जी मेहनत तू करतोयस ते बघुन खूप छान वाटतंय, त्यासाठी तुझं विशेष कौतुक. दिवस रात्र ट्रेनिंग सुरु आहे त्यामुळे तुझं हे काम नक्कीच उत्तम होईल याची खात्री आहे. आम्हा प्रेक्षकांना “सूर्याजी दांडकर” तुझ्या रूपात बघायला मिळणार आहेत, ही भुमिका तू जगणार आहेस आणि या भुमिकेतून तुला जे शिकायला मिळणार आहे याचा मला भरपूर आनंद आहे. असाच काम करत राहा. आता हा सिनेमा थिएटर मधे जाऊन बघायची उत्सुकता वाढली आहे. तुमच्या संपूर्ण टीमला खूप शुभेच्छा.'


आदर्शच्या या पोस्टवर नेटकऱ्यांनीही लाइक आणि कमेंट करत त्याला दुजोरा दिला आहे. आम्हालाही त्याला या भूमिकेत पाहायला आवडेल असं म्हणत नेटकऱ्यांनी त्याचं कौतुक केलं आहे.