मुंबई: कलाकृतीला भाषेचा उंबरठा नसतो हे म्हणणं खरं करणारे अनेक रिमेक आजवर पडदयावर आले. सिनेमाक्षेत्रात रिमेकचे प्रयोग मोठ्या पडदयावर होतातच पण आता छोट्या पडदयावरील मालिकाही विविध भाषांमध्ये रिमेक केल्या जात आहेत. आई कुठे काय करते या मालिकेचा अनुपमा नावाने हिंदी रिमेक सुरू आहे. तर राजा राणीची गं जोडी ही मालिका तमिळ भाषेत सुरू आहे. मालिकांचे हे सीमोल्लंघन करण्याचा ट्रेंड चांगलाच लोकप्रिय होत आहे. आता याच ट्रेंडमध्ये बबड्याची आई, आसावरी राजे म्हणजेच मराठमोळी सासूबाई सीमा ओलांडून थेट कन्नडप्रांतात पोहोचणार आहे.
सून पुढाकार घेऊन विधवा सासूबाईचे लग्न करून देते. त्यासाठी नवऱ्याचा विरोध पत्करते अशी वन लाइन स्टोरी असलेल्या अग्गंबाई सासूबाई या मालिकेच्या या हटके कथानकाला प्रेक्षकांनी डोक्यावर घेतले. शीर्षकगीतापासूनच या मालिकेने टीआरपीचे रेकॉर्ड तोडले. निवेदिता सराफ यांनी आसावरीची फक्त भूमिकाच नव्हे तर पाकातले घारगेही घराघरापर्यंत पोहोचवले. मालिका सुरू असतानाही खूप् काही घडामोडी घडल्या. आजोबांची भूमिका करणाऱ्या रवी पटवर्धन यांचे निधन झाले आणि त्यांच्या जागी मोहन जोशी आले. मुख्य व्यक्तीरेखा साकारणाऱ्या निवेदिता यांना कोरोना झाला तेव्हा मालिकेत त्यांचे अनसीन किस्से सांगण्याचा वेगळा प्रयोग केला.
आशुतोष पत्की याने याच मालिकेतून अभिनयाची सुरूवात केली आणि त्याचा बबड्या हा मम्माज बॉय भाव खाऊन गेला. गिरीश ओक यांचा हॅपी गो लकी शेफही कमाल ठरला. तेजश्रीच्या शुभ्रानेही जणू अश्शीच सून हवी हा नवा टॅग आणला. थोडक्यात काय तर अग्ग्ंबाई सासूबाईची भट्टी चांगलीच जमली. पण जेव्हा या मालिकेचा अग्गंबाई सूनबाई सिक्वेल आला तेव्हा मात्र ही नवी कथा प्रेक्षकांना रूचली नाही आणि या मालिकेला गुंडाळावे लागले. आता या मालिकेचा कन्नड भाषेत रिमेक होणार या बातमीने ही मालिका पुन्हा चर्चेत आली आहे.