डिलिव्हरीच्या दीड महिन्यातच दोरीला उलटं लटकून आलिया भट्टचं योगासन, पाहून चाहते झाले हैराण

मुंबई- बॉलिवूडची लोकप्रिय अभिनेत्री आलिया भट्ट नुकतीच आई झाली आहे. ती सध्या तिच्या आईपणाचा आनंद घेत आहे. आलियाने दीड महिन्यांपूर्वी एका गोंडस मुलीला जन्म दिला. तिचं नाव राहा आहे. मुलीच्या जन्मानंतर पुन्हा एकदा आलिया आपल्या फिटनेसवर लक्ष केंद्रित करताना दिसतेय. ती आपल्या कामाच्या आणि व्यायामाच्या बाबतीत प्रचंड सजग आहे. ती पुन्हा एकदा जिम आणि योग करताना दिसतेय. मात्र आलियाचा नवा फोटो पाहून चाहतेही चकीत झाले आहेत. आलियाने नुकताच तिचा एक फोटो शेअर केला आहे ज्यात ती एरियल योग करताना दिसतेय. ती एका दोरीच्या साहाय्याने योग करताना दिसतेय. तिचा हा फोटो पाहून चाहते चाट पडले आहेत.


आलियाने महिन्याभरापूर्वी राहाला जन्म दिला. बाळाची काळजी घेत असतानाच ती स्वतःची देखील योग्य ती काळजी घेताना दिसतेय. बाळाच्या जन्मानंतर काही दिवसातच तिने जिमला जाण्यास सुरुवात केली होती. आता तिने तिचा एक फोटो चाहत्यांसोबत शेअर केला आहे जो नेटकऱ्यांना प्रचंड पसंत पडला आहे. सोबतच चाहत्यांना आलियाचं अप्रूपही वाटत आहे. कारण या व्हिडिओमध्ये ती दोरीच्या साहाय्याने उलटं लटकून योग करत आहे. डिलिव्हरीच्या दीड महिन्यातच ती एरियल योग करतेय. हे पाहून नेटकरीही तिचं कौतुक करत आहेत. ही पोस्ट शेअर करत आलियाने लिहिलं, 'डिलिव्हरच्या दीड महिन्यानंतर हळूहळू मी माझ्या शरीरासोबत संवाद साधत आहे.'


आपल्या जिम ट्रेनरचं नाव सांगत तिने लिहिलं, 'मी आज हे केलं. सगळ्या आई झालेल्या स्त्रियांना सांगू इच्छिते की डिलिव्हरीनंतर आपल्या शरीराचं ऐका. असं काही करू नका जे करण्यासाठी तुमचं शरीर परवानगी देत नाही किंवा जे करायला तुमचं शरीर तयार नाही. पहिले दोन आठवडे, मी फक्त वर्कआउट्स दरम्यान श्वासाचे व्यायाम केले. चालले. ,माझं शरीर संतुलन परत मिळवलं. तुमचा वेळ घ्या. तुमच्या शरीराने जे केलं त्याचं कौतुक करा.' आलियाच्या या पोस्टचं आता चाहते भरभरून कौतुक करत आहेत.