मुंबई: निर्माती म्हणून आलिया भट्टचा (Alia Bhatt Upcoming Movie) पहिला-वहिला सिनेमा प्रदर्शनासाठी सज्ज झाला आहे. 'डार्लिंग्ज' (Darlings Teaser Out) असं या सिनेमाचं नाव असून अभिनेत्रीसह विजय वर्मा, शेफाली शाह आणि रोशन मॅथ्यू अशी तगडी स्टारकास्ट असणार आहे. मंगळवारी या सिनेमाची पहिली झलक पाहायला मिळाली आहे. 'डार्लिंग्ज' या डार्क कॉमेडी सिनेमाचा टीजर प्रदर्शित झाला असून त्यात आलिया-विजयचा खतरनाक अंदाज पाहायला मिळत आहे.
आलिया भट्टचा डार्लिंग्ज नेटफ्लिक्स या ओटीटी प्लॅटफॉर्मवर ५ ऑगस्ट रोजी प्रदर्शित होणार आहे. 'डार्लिंग्ज हे फक्त टीज आहे, 5 ऑगस्ट रोजी होणार प्रदर्शित #DarlingsOnNetflix' अशी कॅप्शन देत आलियाने हा टीजर शेअर केला आहे. या सिनेमाची पहिली झलक शेअर करताना मेकर्सनी लोकप्रिय असणारी विंचू-बेडकाची गोष्ट सांगितली आहे. आलियाच्या आवाजात ही कहाणी ऐकताना नक्कीच हृदयाची धडधड वाढते आणि पुढे काय होणार याची उत्सुकता लागून राहते.
यामध्ये आता नक्की विंचू कोण आणि बेडूक कोण याचा उलगडा सिनेमा प्रदर्शित झाल्यानंतरच समजणार आहे. नेटफ्लिक्स इंडियाने या सिनेमाचा टीजर शेअर करताना असा सवाल विचारला आहे की, 'एक बेडूक आणि विंचू कधी मित्र होऊ शकतात का?' त्यामुळे 'डार्लिंग्ज'बाबत उत्कंठा वाढली आहे.
इथे पाहा डार्लिंग्जचा टीजर
शाहरुख खानच्या 'रेड चिलीज एंटरटेनमेंट'ने डार्लिंग्जची निर्मिती केली असून आलिया सिनेमाची सहनिर्माती आहे. त्यामुळे 'डिअर जिंदगी' नंतर पुन्हा एकदा आलिया-शाहरुख हे समीकरण चाहत्यांना अनुभवता येईल. या सिनेमाचे दिग्दर्शन जसमीत के रीन यांचे आहे.
हे वाचा-पती विग्नेशच्या मिठीमध्ये नयनतारा, रोमँटिक फोटोवरुन हटत नाही नजर!
प्रेग्नन्सीच्या वृत्तामुळे चर्चेत असणारी आलिया आता 'डार्लिंग्ज'मुळे चर्चेत आली आहे. या सिनेमा म्हणजे डार्क कॉमेडी असल्याचा दावा मेकर्सकडून केला जातो आहे. टीजरची घोषणा करण्यात आली त्यावेळी यात 'डार्क कॉमेडी' पाहायला मिळणार असे सांगण्यात आले होते. आता ५ ऑगस्ट रोजी यात नेमकं काय असणार याचा उलगडा होईल.
आई-मुलीचं नातं, रोमँटिक ट्रॅक आणि सस्पेन्स या गोष्टी टीजरमध्ये पाहायला मिळत आहेत. शेफाली शाह या सिनेमात आलियाच्या आईची भूमिका साकारत असून विजय आणि आलिया यांच्यात रोमँटिक कनेक्शन पाहायला मिळतंय. रोशन आणि विजय यांची कहाणी सिनेमामध्ये वेगळं कथानक आणणारी ठरू शकते. याशिवाय टीजरमध्ये शेवटी आलियाचा बदललेला अंदाज आणखी सस्पेन्स वाढवणारा आहे.