मराठी कलाकारांनी राजकारणात येऊ नये का? त्या घटनेमुळे अमोल कोल्हेंचा संतप्त सवाल

मुंबई- छोट्या पडद्यासह मोठ्या पडद्यावर आपल्या अभिनयाचा ठसा उमटवणारे लोकप्रिय अभिनेते अमोल कोल्हे त्यांनी साकारलेल्या छत्रपती शिवाजी महाराजांच्या भूमिकेमुळे घराघरात पोहोचले. छत्रपती शिवाजी महाराज म्हटलं की डोळ्यासमोर उभे राहतात ते अमोल कोल्हे. त्यांनी 'राजा शिवछत्रपती' या मालिकेतून प्रेक्षकांच्या मनात एक वेगळं स्थान निर्माण केलं. अजूनही अनेक महानाट्यांमधून शिवाजी महाराज आणि संभाजी महाराजांचं कार्य लोकांपर्यत पोहोचवण्याचं काम ते करत आहेत. मात्र छत्रपती शिवाजी महाराजांना साकारायचा १६ वर्षांचा दांडगा अनुभव असला तरीही त्यांना शिवरायांना आवाज देण्यापासून रिजेक्ट करण्यात आलं. ते केवळ एका राजकीय पक्षातील नेते आहेत त्यामुळे त्यांना शिवरायांना आवाज देण्यापासून रोखण्यात आलं. एका व्हिडिओमध्ये त्यांनी याबद्दल सांगितलं आहे.


मराठी कलाकारांनी राजकारणात यावं का? असा एक व्हिडिओ त्यांनी त्यांच्या युट्यूब चॅनेलवर शेअर केला आहे. यात ते बोलताना म्हणतात, 'रायगड किल्ल्यावर एक लाइट आणि साऊंड शो होणार होता. त्यासाठी मला एक दिवस अचानक फोन आला आणि त्यांनी विचारलं की छत्रपती शिवाजी महाराजांच्या भूमिकेसाठी तुमचा आवाज हवा आहे तर ते शक्य होईल का? मी छत्रपतींचं काम म्हणून लगेच हो म्हटलं. कोणतीही तारीख सांगा मी तयार आहे आणि मानधन तुम्ही बंद पाकिटात जे द्याल ते मला मान्य आहे आणि मी वाट पाहत होतो कारण मी उत्सुक होतो. पण दुसऱ्या- तिसऱ्या दिवशी मला जेव्हा फोन आला तेव्हा तो फोन असा होता की छत्रपती शिवाजी महाराजांच्या भूमिकेसाठी तुमचा आवाज सूट होणार नाही. म्हणजे नाकारलं जाणं यात काहीही वावगं नाही पण एवढी वर्ष हे काम केल्यानंतर अचानक तुम्हाला असं म्हणतात जातं तेव्हा तो आश्चर्याचा धक्का असतो.'

पुढे ते म्हणाले, 'म्हणजे सुरुवातीला स्वतःहून फोन करणारे नंतर वरून सूत्र हलल्यानंतर असं म्हणतात तेव्हा मनात अनेक प्रश्न निर्माण होतात. हे राजकीय हेतूने झालं का? असंच आणखी एका कार्यक्रमात झालेलं. तेव्हाही त्यांच्या प्रयोजकांना मी एका विशिष्ट पक्षाचा नेता आहे हे खटकलं होतं बहुधा. पण यामध्ये ते लोक कलाकार आणि राजकारण यांची सरमिसळ का करत आहेत? मी राजकारणात आहे त्यामुळे माझ्यातल्या कलाकाराला नाकारलं जातंय का? मराठी कलाकारांनी राजकारणात यायचं नाही का? असे अनेक प्रश्न मला पडले आहेत.
मराठी अभिनेत्रीनं शेअर केला खास फोटो, तुम्ही ओळखलं का? सोशल मीडियावर आहे तिची प्रचंड क्रेझ