क्रिकेटरशी लग्नावर आली अनुष्का शेट्टीची प्रतिक्रिया, जाणून घ्या सत्य

नवी दिल्ली- काही दिवसांपूर्वी दाक्षिणात्य अभिनेत्री अनुष्का शेट्टी आणि भारतीय क्रिकेटरच्या लग्नाच्या चर्चा रंगल्या होत्या. लवकरच अनुष्का क्रिकेटरशी लग्न करणार असल्याचं म्हटलं जात होतं. विशेष म्हणजे तो क्रिकेटर दाक्षिणात्य नसून उत्तर भारतातील आहे असं म्हटलं जात होतं. एवढंच नाही तर हा क्रिकेटर दाक्षिणात्य संघाकडून रणजी सामनेही खेळतो.

अनुष्का शेट्टीने दिलं उत्तर-

या बातमीवर आता अनुष्काची प्रतिक्रिया आली आहे. अनुष्का म्हणाली की, 'एकदा तर लोकांनी सांगितलं की मी प्रेमात आहे आणि नंतर मी कोणालाही न सांगता लग्न केल्याच्या चर्चा होत्या. आता क्रिकेटरसोबतच माझं नाव जोडलं जात आहे. आता मीही एक अफवा उडवणार आहे की माझं लग्न ठरलं आहे. जेणेकरून या सर्व गोष्टींना पूर्ण विराम मिळेल.'

आई- वडील घेणार लग्नाचा निर्णय

अनुष्का म्हणाली की, तिच्या लग्नाचे आणि रिलेशनशिपच्या अनेक अफवा सतत तिच्या कानावर येत असतात. पण तिच्या लग्नाचा निर्णय तिचे आई- बाबा घेणार असल्याचं अनुष्काने सांगितलं. तेच लग्नाचा योग्य निर्णय घेतील असंही अनुष्काने स्पष्ट केलं.

पदार्पणापासूनच होतायेत तिच्या लिंकअपच्या चर्चा

अनुष्का शेट्टी ही दाक्षिणात्य सिनेसृष्टीतील मुख्य अभिनेत्रींपैकी एक आहे. सिनेमांमध्ये पदार्पण करण्यापासूनच तिचं नाव व्यावसायिक, डॉक्टर यांच्यासोबत जोडलं गेलं होतं. सुपरस्टार प्रभाससोबतही तिचं नाव जोडलं गेल होतं.