क्वारंटाइनसाठी आयशा टाकियाने खुलं केलं हॉटेल

करोनाचा प्रादुर्भाव झाल्यानंतर संपूर्ण जगावर त्याचा वाईट परिणाम होताना दिसतोय. हे टाळण्यासाठी सगळ्या स्तरांवरुन उपाययोजना होत आहेत. शिवाय इतरांच्या मदतीसाठी अनेकजण पुढे येत आहेत. बॉलिवूड सेलिब्रिटींनी ही आतापर्यंत करोनामुळे बाधित झालेल्यांना मोठी मदत केली आहे. अक्षय कुमार, संजय दत्त, हृतिक रोशन, शाहरुख खान, सलमान खान या आणि इतर कलाकारांकडून सतत लोकांना मदत केली जातेय. यापैकी काही सेलिब्रिटींनी पंतप्रधान सहाय्यता निधीसाठी आर्थिक मदत देऊ केली आहे. तर काही जणांनी सिनेसृष्टीतल्या कामगांच्या कुटुंबियांची जबाबदारी घेतली आहे. आता अभिनेत्री आयशा टाकिया आणि तिचा नवरा फरहान आझमी यांनी देखील मदतीचा हात पुढे केलाय.

बीएमसीसाठी खुलं केलं हॉटेल
करोनामुळे लोकांना खाण्यापासून ते राहण्यापर्यंत अनेक अडचणींचा सामना करावा लागतोय. याशिवाय, लोकांना क्वारंटाइन करण्यासाठी जागेची देखील आवश्यकता आहे. अशा परिस्थितीत आयशा टाकियाने मदतीचा हात पुढे केला आहे. मुंबईत करोनाचे रुग्ण वाढू लागले आहेत. महापालिका प्रशासनावर ताण वाढत आहे. त्यामुळे जागेची कमतरता भासण्याची शक्यता आहे. एका वृत्तानुसार, हिच गोष्ट लक्षात घेत आयशा टाकिया आणि तिच्या नवऱ्याने बृहन्मुंबई महानगरपालिकेसाठी त्यांचं दक्षिण मुंबईतील 'गल्फ' हॉटेल खुलं केलं आहे.

सेलिब्रिटींचा मदतीचा हात
यापूर्वी शाहरुख खानने मुंबई महानगरपालिकेला आपलं ४ मजली कार्यालय वापरण्यास सांगितलं होतं. अभिनेता सोनू सूदनेही आपलं मुंबईतील जुहू येथील ६ मजली हॉटेल डॉक्टरांना राहण्यासाठी दिलं आहे.
दरम्यान, टाटा समूहाच्या मालकीची मुंबईतील पंचतारांकित हाॅटेल्स देखील महापालिकेच्या डाॅक्टर आणि वैद्यकीय सेवेतील कर्मचाऱ्यांना खुली केली आहेत.
जॉन- प्रियाचे हे फोटो तुम्ही याआधी पाहिले नसतील