तुझ्या माझ्या संसाराला! कुटुंबासाठी आयुष्मान खुरानाने विकत घेतलं मुंबईत पहिलं घर

मुंबई- आयुष्मान खुरानाने अल्पावधीतच बॉलीवूडमध्ये स्वत:चं स्थान निर्माण केलं आहे. त्याचं कारण म्हणजे सिनेमांची त्यांची निवड आणि अभिनय. व्यावसायिकदृष्ट्या आयुष्मान सतत स्वत:ला सिद्ध करत असताना त्याच्या वैयक्तिक आयुष्यात एक मोठी आनंदाची बातमी समोर आली आहे. असं सांगितलं जातं की, आयुष्मान खुराना ने मुंबईत या स्वप्नांच्या शहरात स्वतःचं घर विकत घेतलं आहे.

रिपोर्टनुसार, आयुष्मानने मुंबईत त्याचं आलिशान घर विकत घेतलं आहे. या ड्रीम हाउसची किंमत जवळपास १९ कोटी रुपये असल्याचं सांगण्यात येत आहे. या घरासोबत चार गाड्यांसाठी पार्किंगची जागा असल्याचं सांगण्यात येत आहे. मनी कंट्रोलच्या रिपोर्टनुसार, आयुष्मान लवकरच पत्नी आणि मुलांसोबत नवीन घरात प्रवेश करणार आहे.

रिपोर्टनुसार, या अपार्टमेंटचं रजिस्ट्रेशन २९ नोव्हेंबर २०२१ रोजी झालं होतं ज्यासाठी अभिनेत्याने ९६ लाख ५० हजार रुपयांचं मुद्रांक शुल्क भरलं आहे. ४ हजार ०२७ स्क्वेअर फूटांचं आयुष्मानचं हे घर आहे.


याआधी आयुष्मानने त्याच्या मूळ गावी पंचकुलामध्ये एक आलिशान बंगला विकत घेतला होता. संपूर्ण कुटुंब एकत्र राहावं यासाठी आयुष्मानने हे घर विकत घेतलं होतं. याबाबत आयुष्मान म्हणाला होता, 'खुरानाजने नवीन फॅमिली होम विकत घेतलं आहे. संपूर्ण कुटुंबाने हे नवीन घर विकत घेण्याचा निर्णय घेतला जिथे संपूर्ण खुराणा कुटुंब एकत्र राहू शकेल.' या बंगल्याची कागदोपत्री किंमत ९ कोटी रुपये असल्याचं सांगण्यात आलं.


आयुष्मान खुराना व्यतिरिक्त अर्जुन कपूरनेदेखील नुकतेच स्वतःसाठी एक नवीन घर विकत घेतले आहे, ज्याची किंमत सुमारे २० कोटी आहे. अर्जुनचं हे नवीन घर मलायका अरोराच्या घराजवळ आहे.


आयुष्मान खुरानाच्या कामाबद्दल बोलायचं झालं तर नुकताच त्याचा 'चंदीगढ करे आशिकी' हा चित्रपट प्रदर्शित झाला. यात त्याच्यासोबत वाणी कपूर मुख्य भूमिकेत दिसली. या चित्रपटाला प्रेक्षक आणि समीक्षकांकडून भरभरून दाद मिळाली. याशिवाय आयुष्मान अनुभव सिन्हांच्या ‘अनेक’ या चित्रपटातही दिसणार आहे. या चित्रपटात विकास शर्मा आणि शेफाली गांगुली महत्त्वाच्या भूमिकेत आहेत.