अरिजीत सिंहच्या कॉन्सर्टचे तिकीट १६ लाख रुपये? चाहते म्हणाले- रडण्यासाठी एवढे पैसे नाही देणार

मुंबई: बॉलिवूडचा प्रसिद्ध गायक अरिजीत सिंहचे देशभरात असंख्य चाहते आहेत. त्यामुळे त्याला लाइव्ह ऐकण्यासाठी तर प्रेक्षक गर्दी करतात. दरम्यान मीडिया रिपोर्टनुसार अरिजीत सिंह लवकरच भारत दौरा करणार आहे. भारतातील विविध महत्त्वाच्या शहरात अरिजीतची कॉन्सर्ट होणार आहे. चाहते या कॉन्सर्टसाठी उत्सुक तर आहेत पण सोशल मीडियावर या कॉन्सर्टबाबत एक स्क्रिनशॉट व्हायरल होतो आहे, जो पाहून प्रेक्षकांच्या पायाखालची जमीन सरकली आहे.

तिकिटाचा व्हायरल होणारा स्क्रिनशॉट थक्क करणारा

व्हायरल होणारा स्क्रिनशॉट अरिजीत सिंहच्या कॉन्सर्टच्या बुकिंगचा आहे. ज्यामध्ये कॉन्सर्टच्या तिकिटांची किंमत दिसते आहे. या व्हायरल फोटोनुसार अरिजीतच्या कॉन्सर्टची किंमत १६ लाख रुपये आहे! सोशल मीडियावर व्हायरल होणाऱ्या या फोटोवर विविध कमेंट्स येत आहेत.

हे वाचा-प्रसिद्ध गायिकेने राहत्या घरात गमावला जीव; मृत्यूचे कारण अद्यापही अस्पष्ट

या स्क्रिनशॉटमध्ये विविध प्रकारच्या तिकिटांचे दर आहेत. ज्याची सुरुवात ९९९ रुपयांपासून होत असून सर्वात महागडे तिकिट १६ लाखांचे आहे. सर्वात महागडे तिकिट प्रीमियम लाउंज या कॅटेगरीतील आहे, त्यामुळे त्याचे दर एवढे जास्त असल्याचे बोलले जात आहे. प्रीमियम लाउंजचे तिकीट असले तरीही एवढे पैसे देऊन कॉन्सर्ट पाहायला जाणाऱ्यांची संख्या नक्कीच बोटावर मोजणाऱ्यांची असेल. याशिवाय १२ आणि १४ लाखाचे तिकिटही आहे.


हे वाचा-मी तुझी कधी प्रेयसी, कधी पत्नी तर कधी सून झाले... नीना कुळकर्णी झाल्या भावुक

'१६ लाखात अरिजीतच्या शेजारी घेऊ घर'

एका युजरने हा स्क्रिनशॉट शेअर करत म्हटले आहे की 'मला अरिजीतची गाणी आवडतात पण एवढे पैसे खर्च करणार नाही'. त्यावर एका युजरने अशी कमेंट केली आहे की, '१६ लाखात त्याने स्वत: घरी येऊन आम्हाला गाणं ऐकवलं पाहिजे.'




अरिजीतची अनेक गाणी सॅड साँग या विभागातील आहेत. त्यामुळे एकाने अशी कमेंट केली आहे, 'रडण्यासाठी १६ लाख कुणी खर्च करू नये.' आणखी एका युजरने अशी कमेंट केली आहे की, '१६ लाखात अरिजीतच्या शेजारी घर घेऊ, रोज त्याला ऐकता येईल'. व्हायरल होणाऱ्या या स्क्रिनशॉटवर अशाप्रकारे मजेशीर कमेंट्स आल्या आहेत. दरम्यान मीडिया रिपोर्टनुसार अरिजीत २७ जानेवारी २०२३ रोजी पुण्यात कॉन्सर्ट होणार आहे.