बॉलिवूड चित्रपट मिळाल्याचं सेलिब्रेशन,मराठमोळी अभिनेत्री बार काउंटरवर बेभान होऊन नाचली

मुंबई: कोणत्याही कलाकारासाठी बॉलिवूडमध्ये काम करणं, मोठ्या पडद्यावर झळकणं हे स्वप्नचं असतं. असxच काही मराठमोळे कलाकार आहेत, जे लवकरच बॉलिवूडमध्ये एन्ट्री करणार आहे. टीव्ही मालिकांमधून घराघरात पोहोचलेले कलाकार आता मोठ्या पडद्यावरुन प्रेक्षकांच्या भेटीला येणार आहेत. त्यापैकी एक म्हणजे अभिनेत्री पल्लवी पाटील.

'रुंजी' या मालिकेमुळं पल्लवी घराघरात पोहोचली. तसंच'पार्टनर' या एकांकिकेतून पल्लवीला खूप लोकप्रियता मिळाली होती. पल्लवीनं 'बापमाणूस' या मालिकेतील अभिनयानं प्रेक्षकांची मनं जिंकली. त्यानंतर ती 'अग्निहोत्र २' या मालिकेतून प्रेक्षकांच्या भेटीला आली होती. आता ती बॉलिवूड चित्रपटात झळकणार आहे.

हिंदी किंवा अन्य भाषिक चित्रपटावर आधारित मराठी चित्रपटाचा ट्रेंड तसा जुना आहे. पण मराठी चित्रपटाच्या कथेवर बेतलेल्या हिंदी चित्रपटांची संख्या तशी फारशी नाही. ‘लपाछपी’ या चित्रपटाच्या कथेवर 'छोरी' हा चित्रपट आला होता. या चित्रपटातील नुसरतचा अभिनय आणि त्यातील थरार प्रेक्षकांना विशेष भावला होता. आता या चित्रपटाचा सिक्वेल येणार आहे. त्याची अधिकृत घोषणा नुकतीच करण्यात आली. विशेष म्हणजे चित्रपटाच्या दुसऱ्या भागात अभिनेता गष्मीर महाजनी आणि पल्लवी पाटील हे मराठी कलाकार महत्त्वपूर्ण भूमिकेत दिसणार आहेत. याच्या चित्रीकरणाला नुकतीच सुरुवात झाली असून आपले हे मराठमोळे कलाकार यात काय कमाल दाखवतात हे पाहणं औत्सुक्याचं असणार आहे.

पण या चित्रपटाची घोषणा झाल्यानंतर पल्लवीचा आनंद गगनात मावेनाचा झाला आहे. सध्या तिचा एक व्हिडिओ सोशल मीडियावर प्रचंड व्हायरल होत असून या व्हिडिओत ती मनसोक्त , बेभान होऊन नाचताना दिसून येत आहे. पल्लवीनं तिच्या इन्स्टाग्रामवर हा व्हिडिओ शेअर केलाय. यात ती एका पबमध्ये बार काऊंटवर चढून बेभान होऊन नाचताना दिसतेय.


पल्लवीचा हा व्हिडिओ पाहून चाहत्यांनी लाइक्स आणि कमेंट्सचा वर्षाव केला आहे. तिचं हे असं रूप पहिल्यांदाच पाहिल्याचं अनेकांनी म्हटलं आहे. तसंच तिची एनर्जी पाहूनही अनेकांनी कमेंट्स केल्या आहेत.