मी त्यांचं कौतुक केलं असलं तरी... Bycott ट्रेंडवर स्पष्टच बोलले राहुल देशपांडे

मुंबई: एका सामान्य मुलाला त्याची आई मोठी स्वप्नं दाखवते. शारीरीक व्यंग असलेल्या मुलाच्या मनातून त्याचा न्यूनगंड बाजूला काढते. त्यानंतर लाल सिंह चढ्ढा त्याच्या आयुष्यात कसा पुढे जातो अशी कथा असलेल्या लाल सिंह चढ्ढा या सिनेमाचं खास स्क्रिनिंग प्रदर्शनापूर्वी झालं. या खास शोला अनेक मराठी कलाकारांनाही निमंत्रण देण्यात आलं होतं. यामध्ये शास्त्रीय गायक व अभिनेते राहुल देशपांडे यांनाही बोलवण्यात आलं होतं. लाल सिंह चढ्ढा सिनेमाच्या त्या खास स्क्रिनिंगमध्ये राहुल यांनी प्रतिक्रिया देताना काही मुद्दे मांडले होते. त्या मुद्द्यांवरूनच राहुल यांनी माझ्या बोलण्याचा वेगळा अर्थ काढला जातोय असं वाटत असल्याचं सोशलमीडियावरील पोस्टमध्ये म्हटलं आहे.
चाळ काही विसरत नसते...'दगडी चाळ २' चा जबरदस्त ट्रेलर
सध्या लाल सिंह चढ्ढा या सिनेमाची जोरदार चर्चा सुरू आहे. १९८६ साली प्रदर्शित झालेल्या फॉरेस्ट गंप या हॉलिवूडपटावर बेतलेल्या हा सिनेमा आहे. या सिनेमाच्या प्रदर्शनापूर्वीच लाल सिंह चढ्ढा सिनेमावर बहिष्कार घालण्यासाठी सोशलमीडियावर बॉयकॉट लाल सिंह चढ्ढा हे अभियान ट्रेंडमध्ये आलं. ११ ऑगस्टला लाल सिंह चढ्ढा पडदयावर झळकला. याच वातावरणात मराठी शास्त्रीय गायक व अभिनेते राहुल देशपांडे यांची इन्स्टापोस्ट चर्चेत आली आहे. या पोस्टमध्ये राहुल देशपांडे यांनी त्यांच्या लाल सिंह चढ्ढा सिनेमाच्यानिमित्ताने केलेल्या विधानाचं स्पष्टीकरण दिलं आहे.


आता राहुल देशपांडे यांनी ही पोस्ट का केली असा प्रश्न त्यांच्या चाहत्यांना आणि नेटकऱ्यांना पडला आहे. लाल सिंह चढ्ढा सिनेमाला जो विरोध होत आहे त्यामागे आमिर खान याने यापूर्वी काही देशविरोधात केलेल्या विधानांना कारणीभूत ठरवले जात आहे. काही वर्षापूर्वी आमिर खान तुर्कीला गेला होता, तेव्हा भारताला विरोध करणाऱ्या तुर्की देशाच्या पंतप्रधानांच्या पत्नीसोबत आमिरने फोटो शेअर केला होता. तसेच आमिरवर लव्हजिहादचाही आरोप करण्यात आला होता. भारत देशात राहणं सुरक्षित नाही असंही विधान आमिर खानने केलं होतं ज्यामुळे तो ट्रोल झाला होता. त्याच्या पीके या सिनेमात हिंदूविरोधी संवाद असल्याचे कारण देत प्रेक्षकांनी विरोध केला होता. याचा एकत्रित परिणाम म्हणून आमिर खानचा सिनेमा बघू नका असे अभियान सोशलमीडियावर सुरू होते.

या सिनेमाच्या प्रिमीयरला हजेरी लावली असताना राहुल देशपांडे यांनी आमिर खानसह इतर कलाकारांचंही कौतुक केलं, पण बॉयकॉट लाल सिंह चढ्ढा या अभियानामुळे राहुल यांच्या बोलण्याचा चुकीचा अर्थ काही नेटकऱ्यांनी काढला. यासाठीच राहुल यांनी पोस्ट शेअर करत या सिनेमातील कलाकारांच्या पूर्वविधान किंवा कृतीशी सहमत नसल्याचा निर्वाळा दिला आहे.


राहुल देशपांडे यांनी त्यांच्या इन्स्टापोस्टमध्ये असं लिहिलं आहे की, रसिकहो नमस्कार, लाल सिंह चढ्ढा या सिनेमाच्या प्रिमियरच्या वेळी मी व्यक्त केलेल्या विधानातून पूर्णपणे अनपेक्षित संदेश जातोय असं मला वाटतय. प्रिमियरसाठी एक निमंत्रित कलाकार म्हणून मी त्या सिनेमासाठी परिश्रम घेतलेल्या पडदयावरील व पडदयामागील सर्वांविषयी सदभावना व्यक्त केल्या. याचा अर्थ सिनेमातील कलाकारांनी यापूर्वी केलेल्या कोणत्याही कृतीचे व त्यांनी मांडलेल्या विचारांचे मी समर्थन करतो असं नाही. आपणा सर्वांइतकीच भारतीयत्वाची भावना माझ्या मनातही प्रबळ आहे, व मला त्याचा सार्थ अभिमान आहे. म्हणूनच माझ्या विधानाचा विपर्यास करून घेऊ नये अशी नम्र विनंती.