हवं ते सांगणं निर्मात्यांसाठी आव्हानात्मक : प्रकाश झा

लेखक-अभिनेते-सिनेनिर्माते प्रकाश झा हे कायम सामाजिक विषयांवर काम करत असतात. आरक्षण, घराणेशाहीचं राजकारण असो किंवा सामाजिक उणिवा असो, अशा विविध विषयांवर ते माहितीपूर्ण मनोरंजन करतात. MX ओरिजनलची सीरिज 'आश्रम'मुळे प्रकाश झा पुन्हा एकदा वादात आहेत. झा यांची ही ओटीटीवरील पहिलीच सीरिज आहे. हा शो ऑनलाइन रिलीज होण्यापूर्वीच MX Player नेही डिस्क्लेमर जारी केलं आहे.

झा म्हणाले, 'MX Player ने मला आश्रमसाठी संपर्क साधला तेव्हा संकल्पना मला चांगली वाटली. हा शो लोकांच्या श्रद्धेवर हल्ला करत नाही. हा शो लोकांच्या श्रद्धेचा फायदा घेऊन त्यांचा विश्वासघात करणाऱ्यांवर भाष्य करतो. आपल्या रुढी आणि श्रद्धेला काळीमा फासणाऱ्यांसाठी ही एक चपराक आहे. रिलीजपूर्वीच डिस्क्लेमर जारी करण्याचं कारण म्हणजे, आम्ही आपली संस्कृती आणि श्रद्धेवर विश्वास ठेवतो, पण याचं नाव खराब करणाऱ्यांवर नाही. लोक यामध्ये कसे अडकले जातात आणि बाहेर पडण्याचा मार्गच मिळत नाही यावर आधारित ही सीरिज आहे.' आश्रम वेब सीरिज MX Player वर २८ ऑगस्टपासून मोफत पाहता येणार आहे.

प्रकाश झा यांनी आपल्या कारकीर्दीत अनेक वादांचाही सामना केला. राजनीती, गंगाजल आणि आरक्षण अशा सिनेमांभोवती वाद होता. यावर ते म्हणतात, 'काय सांगायचंय ते नेमक्या शब्दात सांगणं निर्मात्यांसाठी नेहमीच एक आव्हान असतं. एक लेखक म्हणून पूर्ण जबाबदारीने प्रेक्षकांसोबत संवाद साधणे हे एक कर्तव्य असतं. पण अडथळ्याविना या गोष्टी होत नाहीत. माझ्या सिनेमांभोवती अनेक वाद निर्माण केले गेले, गंगाजलपासून ते आतापर्यंत. पण एका बाजूला असलेल्या हुशार आणि प्रगल्भ प्रेक्षकांमुळे मार्ग निघतो.'