FIFAच्या स्टेजवर भारतीय तिरंग्याचा अपमान, चाहते नोरावर भडकले; 'तो' व्हिडिओ व्हायरल

मुंबई: बॉलिवूड अभिनेत्री नोरा फतेही सध्या चर्चेत आहे. त्याचं कारण म्हणजे FIFA World CUP. फिफाच्या मैदानावर गेल्या काही दिवसांत अनेक सेलिब्रिटी कलाकारांनी हजेरी लावल्याचं पाहायला मिळालं. फिफा वर्ल्ड कप २०२२मध्ये फिफा फॅनफेस्टमध्ये नोरा फतेहीचा परफॉर्मन्स झाला. नोराच्या डान्सनं सगळ्यांनाच वेड लावलं. नोराचे अनेक फोटो व्हिडिओ सध्या सोशल मीडियावर व्हायरल होत आहे.

सध्या आखातातील कतारमध्ये फिफाचा थरार रंगला आहे. जगभरातील फुटबॉलप्रेमी कतारमध्ये सामने पहायला आले आहेत. नोरानं फिफा फॅन फेस्टीव्हलमध्ये 'ओ साकी साकी' आणि 'नाच मेरी रानी' या गाण्यावर डान्स केल्याचं पाहायाला मिळालं. नोराच्या डान्सचं तर कौतुक झालं .नोरानं भर स्टेजवर भारताचा तिरंगा हातात धरून जय हिंदच्या घोषणा द्यायला सुरुवात केली तेव्हा एक तिच्यातलं भारतप्रेम दिसून आलं.

नोराचं भारत देशप्रेम पाहून तिच्यावर कौतुकाचा वर्षाव केला जात आहे. असं असलं तरी उत्साहाच्या भरात नोराच्या हातातून मोठी चूक झाल्याचं पाहायला मिळालं. तिच्या हातात असलेला तिरंगा अनेकदा तिच्या हातातून खाली पडला. तसंच तिनं तिरंगा उलटा पडकला आणि फडकवला. हे पाहून नेटकऱ्यांनी तिला ट्रोल केलं आहे. तिरंग्याचा अवमान केल्याचंही अनेकांनी म्हटलं आहे.