न्यूड फोटोशूट प्रकरणी रणवीर सिंगच्या अडचणी वाढल्या, पोलिसांनी पाठवली नोटीस

मुंबई : एका मासिकासाठी नग्नावस्थेत फोटोशूट करणं बॉलिवूड अभिनेता रणवीर सिंग याच्या अंगलट येण्याची शक्यता आहे. या प्रकरणी त्याच्यावर गुन्हा दाखल करण्यात आला होता. आता मुंबई पोलिस त्याच्या घरी पोहोचले होते.

काही दिवसांपूर्वी रणवीरनं न्यूड फोटो फोटो सोशल मीडियावर अपलोड केल्यामुळं व्हायरल झाला. या फोटोमुळं महिलांच्या भावना दुखावल्याचा ठपका ठेऊन रणवीरविरोधात चेंबूर पोलिस ठाण्यात गुन्हा दाखल करण्यात आला होता. याप्रकरणी त्याला नोटीस देण्यासाठी मुंबई पोलिस शुक्रवारी रणवीरच्या मुंबईतील घरी गेले होते. मात्र तो घरी नसल्याचं समोर आलं. मिळालेल्या माहितीनुसार मुंबई पोलिसांनी पाठवलेल्या या नोटिसीमध्ये रणवीर सिंगला २२ ऑगस्टला चेंबूर पोलीस ठाण्यात चौकशीसाठी हजर रहावं लागणार आहे.

काय आहे नेमकं प्रकरण?रणवीरनं काही दिवसांपूवी आपल्या इन्स्टाग्राम प्रोफाइलवर स्वत:चा एक नग्न फोटो पोस्ट केला. या फोटोमुळं समाजाच्या सर्व स्तरांतून त्याच्यावर टीका करण्यात आली. एका स्वयंसेवी संस्थेने रणवीरविरोधात थेट पोलिसांत धाव घेतली. हा फोटो मासिकासाठी काढण्यात आला असून, त्याची विक्री करून मोठ्या प्रमाणात पैसे मिळविण्याचा उद्देश आहे. त्याचप्रमाणे समाजातील तरुण नीतिभ्रष्ट करण्याचा किंवा समाज बिघडविण्याचा हा प्रयत्न आहे. अशा कृत्यामुळेंमहिलांच्या मनात लज्जा उत्पन्न होत असून रणवीर याच्याविरोधात गुन्हा दाखल करावा, अशी मागणी अर्जाद्वारे या संस्थेने चेंबूर पोलिस ठाण्यात केली होती.