प्रियांका चोप्राला जेव्हा 'ए काळी मांजर...' असं चिडवायचे, अभिनेत्रीने सांगितलं कटू सत्य

मुंबई : प्रियांका चोप्रा आज आंतरराष्ट्रीय पातळीवरील नावाजलेली अभिनेत्री झाली आहे. लाखो लोकांच्या मनात प्रियांकानं स्वतःचं असं स्थान निर्माण केलं आहे. आज प्रियांका अनेक तरुणींसाठी आदर्श ठरत असली तरी अभिनेत्रीने आज जे स्थान मिळावलं आहे तिथपर्यंत पोहचण्याचा तिचा प्रवास सोपा नव्हता.

जेव्हा तिनं बॉलिवूडमध्ये काम करायला सुरुवात केली तेव्हा सावळ्या रंगामुळे अनेकदा अवहेलना सहन करावी लागली होती. प्रियांकानं २००२ मध्ये प्रदर्शित झालेल्या Thamizhan या तमिळ सिनेमातून अभिनयाच्या विश्वात पदार्पण केलं. एका मुलाखतीमध्ये प्रियांकानं सुरुवातीच्या काळात रंगभेदाचा जो अनुभव तिला आला त्याबद्दल सांगितलं.


काळी मांजर म्हणून हिणवलं जायचं

बीबीसी वृत्तवाहिनीनं २०२२ मधील सर्वात प्रभावशाली महिलांची यादी तयार केली. त्या यादीत १०० महिलांची निवड झाली असून त्यात प्रियांका चोप्रा च्या नावाचा समावेश आहे. या निमित्तानं प्रियांकानं बीबीसीला दिलेल्या मुलाखतीमध्ये बॉलिवूड आणि तिथं सहन कराव्या लागलेल्या रंगभेदाचा अनुभव सांगितला. प्रियांकानं सांगितलं की, 'बॉलिवूडमध्ये मला काळी मांजर, सावळी म्हटलं जायचं. सावळी म्हणजे नेमकं काय? असा प्रश्न मला अनेकदा पडायचा.'

अशोक सराफांच्या एका वाक्याने बदललं सायली संजीवचं आयुष्य

'कारण आपल्या देशामध्ये अनेकजण सावळेच आहेत. परंतु सातत्यानं हे ऐकल्यामुळे मी सुंदर नाही आणि मला सुंदर दिसण्यासाठी मेहनत घ्यावी लागणार असं कायम वाटायचं. असं असलं तरी मला माझ्या कामाबद्दल आत्मविश्वास होता. माझ्याहून गोऱ्या असणाऱ्यांपेक्षा मी चांगलं काम करू शकते हा विश्वास माझ्यात होता. त्यावेळी या गोष्टी मी फारशा गांभीऱ्यानं घेतल्या नाहीत. कारण हे असं सगळं होणं माझ्याही दृष्टीनं तेव्हा नॉर्मल होतं.'


मानसिकता बदलायला हवी

प्रियांकानं मुलाखतीमध्ये पुढं सांगितलं की, 'आपल्या देशातून ब्रिटीश जाऊन अनेक वर्ष लोटली, परंतु त्यांनी इथल्या लोकांमध्ये रंगाबद्दल जी मानसिकता निर्माण केली ती अजूनही गेलेली नाही. त्या गोष्टी आजही तितक्यात महत्त्वाच्या मानल्या जात आहेत, परंतु आता नवीन पिढीनं या मानसिकतेमधून बाहेर यायला हवं. गोरा रंग म्हणजे चांगला ही मानसिकता बदलायला हवी.'

दिव्या पडली व्यावसायिकाच्या प्रेमात, कोण आहे अपूर्व पाडगांवकर

अभिनेता आणि अभिनेत्रीला समान मानधन हवं

प्रियांकानं त्या कार्यक्रमात बोलताना सांगितलं की, 'मला बॉलिवूडमध्ये कधीच एखाद्या अभिनेत्याच्या बरोबरीनं समान दर्जा मिळाला नाही. अभिनेत्याला जेवढं मानधन दिलं जात होतं त्याच्या फक्त १० टक्के मला दिलं जायचं. ही खूपच मोठी तफावत होती आणि याचमुळे बॉलिवूडमध्ये कितीतरी महिला या सगळ्या गोष्टींसोबत आजही डील करत आहेत. मला माहीत आहे आजही जर बॉलिवूडमध्ये एखाद्या हिरोसोबत काम केलं तर माझ्यासोबतही तेच घडेल. माझ्या जनरेशनच्या सगळ्या अभिनेत्रींनी यासंदर्भात आवाज उठवला आहे पण अद्यापही यात सुधारणा झालेली दिसत नाही.'


आज प्रियांका आंतरराष्ट्रीय पातळीवरील नावाजलेली अभिनेत्री आहे. तिनं भारतात तसंच हॉलिवूडमध्ये स्वतःच्या अभिनयानं वेगळं स्थान निर्माण केलं आहे. प्रियांका झगमगत्या दुनियेत वावरत असली तरी अनेक सामाजिक संस्थांशी आणि सामाजिक कार्यात ती सहभागी होत असते.

काही दिवसांपूर्वी सौदी अरबमध्ये झालेल्या रेड सी इंटरनॅशनल फिल्म फेस्टिवल २०२२ मध्ये अभिनेत्री सहभागी झाली होती. त्यावेळचे तिचे फोटो सोशल मीडियावर व्हायरल झाले होते. प्रियांकाच्या कामाबद्दल सांगायचं तर लवकरच 'लव अगेन' सिनेमात दिसणार आहे. तसंच अॅवेंजर फेम रूसो ब्रदर्स यांच्याबरोबरही प्रियांका काम करत आहे. रूसो ब्रदर्सच्या सिटाडेल सीरिजमध्ये प्रियांकानं काम केलं आहे.