रक्षाबंधनाचा सण या बहिणींसाठी खास
रक्षाबंधनाचा सण भाऊ-बहिणीसाठी एक स्पेशल सण असतो. मराठी मनोरंजन विश्वातही अशी अनेक भावंड आहेत. मात्र काही जोड्या बहिणींच्याही आहेत, ज्या एकमेकींना राखी बांधून रक्षाबंधनाचा सण साजरा करतात. मृण्मयी-गौतमी देशपांडे, चैताली गुप्ते-भार्गवी चिरमुले, तितीक्षा-खुशबू तावडे इ. ही सेलिब्रिटी भावंड आहेत. या आघाडीच्या अभिनेत्रींनी देखील एकेमकांसाठी त्यांनी वेळोवेळी सोशल मीडियावर पोस्ट शेअर केल्या आहेत. अभिनय क्षेत्रातील या सेलिब्रिटी भावडांंच्या जोड्या तुम्हाला माहीत आहेत का?
स्पेशल नातं
अभिनेत्री धनश्री काडगावकर अर्थात प्रेक्षकांची लाडकी वहिनीसाहेब आपल्या भावाविषयी म्हणते की, ‘मला आठवतंय मी आणि सौरभ लहानपणी खूप भांडायचो. मला चिडवण्यासाठी म्हणून तो मुद्दाम ओवाळणीच्या ताटात तेव्हा एक रुपया टाकायचा. नंतर मग आणलेलं गिफ्ट द्यायचा. असं खूप खोडकरपणा असलेलं आणि स्पेशल असं नातं आहे आमचं. आतासुद्धा कामाच्या व्यापामुळे आम्हाला राखीपौर्णिमेच्या वेळी भेटणं जमलं नाही, तरी आम्ही नाराज न होता एकमेकांना समजून घेतो आणि नंतर वेळ काढून भेटून रक्षाबंधन आनंदात साजरी करतो’
खंबीर साथ
गौतमी आणि मृण्मयी देशपांडे यांचे अनेक व्हिडिओ तुम्ही सोशल मीडियावर पाहिले असतील. अनेकदा या दोघी एकमेकींची चेष्टामस्करी करत असतात. मात्र दोघी बहिणींमध्ये तेवढेच प्रेम देखील आहे. अभिनेत्री गौतमी म्हणते की, ‘लहानपणीपासून मृण्मयीताई नेहमीच सगळ्यांपासून माझं रक्षण करयची. पण आता शारीरिक रक्षणापेक्षा मानसिक रक्षण, नकारात्मक विचारांपासून रक्षण करायची जास्त गरज आहे आणि ते आम्ही नेहमीच एकमेकींचं करत असतो. अनेकदा ताई माझ्या खोड्या काढत असली, तरीही वेळप्रसंगी ती नेहमी माझ्या पाठीशी खंबीरपणे उभी राहिली आहे. त्यामुळे आमचं हे खोडकर, प्रेमळ नातं नेहमीच अतूट राहणार याची मला खात्री आहे. प्रत्येक वेळेस रक्षाबंधनच्या दिवशी भेटणं शक्य होतंच असं नाही. पण जेव्हा आम्ही भेटतो, तो प्रत्येक दिवस आमच्यासाठी रक्षाबंधनच आहे.’
आमची तिसरी बहीण
शशांक केतकर याची बहीण देखील मालिका विश्वातील लोकप्रिय अभिनेत्री आहे. तिच्याविषयी बोलताना अभिनेता म्हणतो की, ‘शिक्षणानिमित्त दिक्षा बरीच वर्ष अमेरिकेत तर मी ऑस्ट्रेलियाला राहायचो. पण आम्हाला जोडणारी तिसरी बहीण ही आमच्यातली दुवा होती. ती म्हणजे आमच्याकडे असणारी जर्मन शेफर्ड ‘मॅगी’ ही होय. आम्ही तिलाच रक्षाबंधनच्या दिवशी राखी बांधून आनंद साजरा करायचो. आम्ही नेहमीच सगळे निर्णय एकमेकांशी बोलून, समजून घेतो. दिक्षा माझी लहान बहीण असली, तरी देखील तिच्याकडून शिकण्यासारखं फार आहे. योग्य निर्णयात मी नेहमीच तिच्या सोबत होतो आणि कायम राहेन.’
ताईच्या पावलावर पाऊल
तितीक्षा आणि खुशबू या दोन्ही बहिणींनी अभिनय क्षेत्रात आपली छाप सोडली आहे. बहिणीविषयी बोलताना तितीक्षा म्हणते की, ‘लहानपणापासूनच मी, खुशबू जे करायची ते करत आले आहे. क्रिकेट, हॉटेल मॅनेजमेंट ते अगदी अभिनयात पदार्पण हे सगळं तिच्याकडे बघूनच मी केलंय. खुशबू आणि माझ्यात इतकं साम्य आहे की इतक्या वर्षात लहानपणापासून एकदाही आमच्यात भांडण झालं नाही. तिची महत्त्वाकांक्षा, तिचे विचार आणि धाडसी निर्णय या सगळ्यातून मला नेहमीच शिकायला मिळालंय. अनेक वर्ष आम्ही एकमेकींना राखी बांधत रक्षाबंधनचा सण साजरा करत आलोय. त्यामुळे यंदाचं रक्षाबंधनसुद्धा तसंच पार पडेल.’
सुखद ‘सरप्राइज’
आई कुठे काय करते फेम अभिषेक देशमुख आणि पुण्याची टॉकरवडी अमृता हे दोघंही सख्खे भावंड आहेत. अभिषेक तिच्याविषयी बोलताना म्हणतो की, ‘मी अमृतापेक्षा मोठा आहे. पण सर्वांनाच ती माझी मोठी बहीण वाटते. माझा स्वभाव मुळातच खोडकर असल्यामुळे अमृता नेहमीच माझ्या चुका काढून माझ्यावर ताईगिरी करत असते. मागील रक्षाबंधनाच्या वेळेस तिने ‘आई कुठे काय करते’च्या सेटवर येऊन मला सरप्राइज दिलं होतं. तो क्षण माझ्यासाठी खूप विशेष होता. यंदा शूटिंगमुळे रक्षाबंधनाला आमची भेट होऊ शकणार नाही. पण मालिकेत राखी बांधून घेताना अमृताची प्रकर्षाने आठवण येईल.’
माझी समीक्षक
भार्गवी आणि चैताली या बहिणींची जोडीही प्रसिद्ध आहे. भार्गवी म्हणते की, ‘गेली अनेक वर्ष मी आणि चैत्राली एकमेकींना राखी बांधत हा सण साजरा करत आहोत. यावर्षी रक्षाबंधनाच्या सणासाठी चित्रिकरणामधून वेळ काढत आम्ही ती साजरी करणार आहोत. मी केलेल्या कामावर, आमचं नातं बाजूला ठेवून ती नेहमीच तिचं स्पष्ट मत देते. त्यामुळे तिला मी माझी सर्वात मोठी समीक्षक मानते. एकमेकांशी जोडलेले राहणं आणि तरीसुद्धा एकमेकींना स्वतःची स्पेस देणं ही आमच्या नात्यातली विशेष बाब आहे असं मला वाटतं. माझ्या चांगल्या-वाईट गोष्टींमधे कायम खंबीरपणे माझ्यासोबत उभं राहिल्याबद्दल रक्षाबंधनाच्या सणाला मी तिला थँक्यू म्हणेन. यापुढेही ती नेहमीच माझ्यासोबत असेल याची खात्री आहे.’