हिची फिगर म्हणजे... रवीना टंडनलाही करावा लागलेला बॉडीशेमिंगचा सामना; म्हणाली-

मुंबई- बॉलिवूडची मस्त मस्त गर्ल असणारी लोकप्रिय अभिनेत्री रवीना टंडनने ९० च्या दशकात चित्रपटसृष्टीवर राज्य केलं. तिने तिच्या सौंदर्याने प्रेक्षकांना भुरळ घातली. रवीनाचे वडील रवी टंडन तेव्हाचे मोठे दिग्दर्शक होते त्यामुळे भलेही तिला सिनेसृष्टीत स्ट्रगल करावा लागला नाही परंतु, तिनेही बॉडीशेमिंगचा सामना केला आहे. चित्रपटसृष्टीमध्ये लोकांचे टोमणे ऐकलेत. नुकत्याच दिलेल्या एका मुलाखतीत रवीनाने याबद्दल सांगितलं. नव्वदच्या दशकात तिला कोणकोणत्या गोष्टींवरून टोमणे मारले जायचे हे तिने सांगितलं. तिने त्या पत्रकार महिलांचं वर्णनही केलं ज्या तिच्या शरीराच्या विशिष्ट भागावर लिहीत तीची खिल्ली उडवायच्या.


गॉसीप मॅगझीनमध्ये रवीनाबद्दल असं काही छापून यायचं ज्यामुळे कुणाचंही करियर धोक्यात येऊ शकतं. रवीना ही चित्रपटसृष्टीमधील सुंदर अभिनेत्रींपैकी एक आहे. मात्र तिलाही भयंकर बॉडीशेमिंगचा सामना करावा लागला आहे. मुलाखतीत बोलताना रवीना म्हणाली, '९०च्या मॅगझीन अतिशय घाणेरड्या होत्या. त्या लिहिणाऱ्या काही स्त्रियांना मी आजही पाहते ज्या स्वातंत्र्याचा बिल्ला घेऊन फिरतात. पण त्या वेळेस त्या महिलांच्याच वैरी होत्या. त्या इतर स्त्रियांना बॉडीशेमिंग करायच्या. स्त्रियांना स्वतःची लाज वाटेल असं लिहायच्या आणि आज त्या उजळ माथ्याने फिरतायत. स्त्रियांना पाठिंबा द्यायच्या ऐवजी त्या काय करायच्या? त्या सुरुवातीला त्या अभिनेत्याच्या प्रेमात पडायच्या आणि मग तो हिरो जो काही म्हणेल ते त्यांच्यासाठी खरं असायचं. तेच त्या मॅगझीनमध्ये छापायच्या. मग त्या मॅगझीनमध्ये समोरच्याच्या अब्रूचे धिंदवडे काढायच्या. का? तर त्या हिरोला माझी बदनामी झालेली पाहायची होती.'


पुढे रवीना म्हणाली, 'मला खूप काही म्हटलं गेलं. माझ्या मांड्यांवर कमेंट केल्या गेल्या. तिच्या मांड्या किती मोठ्या आहेत, 'थंडर थाइज' आहेत असं म्हटलं गेलं. ही नव्वद किलोची आहे. मी १६ व्या वर्षी काम सुरू केलं होतं. तेव्हा मी जाड होते. मला आता त्याचा काही फरक पडत नाही. मला मी जशी आहे तसंचं राहायला आवडतं.' रवीनाने ९० च्या दशकात चित्रपटांतून ब्रेक घेतला आई अनिल थडानी यांच्यासोबत लग्न केलं.