ड्रग्जसाठी त्याने... रियाने केले सुशांतसंदर्भात धक्कादायक आणि गंभीर खुलासे

मुंबई: अभिनेता सुशांतसिंह राजपूत मृत्यू प्रकरणाशी संबंधित असलेल्या अमली पदार्थ पुरवठ्याच्या प्रकरणात अटकेत असलेली अभिनेत्री रिया चक्रवर्ती आणि तिचा भाऊ शौविक चक्रवर्ती यांनी जामीन मिळवण्यासाठी अखेर मुंबई उच्च न्यायालयात धाव घेतली आहे. त्यांच्या जामीन अर्जांवर आज, बुधवारी न्यायमूर्ती सारंग कोतवाल यांच्यासमोर प्राथमिक सुनावणी होण्याची शक्यता होती, परंतु मुंबईत सुरू असलेल्या पावासामुळे कोर्टाचं कामकाज आज बंद ठेवण्यात आलं आहे. त्यामुळं या प्रकरणी उद्या सुनावणी होणार आहे.

दरम्यान, रियाची न्यायालयीन कोठडीची मुदत संपल्याने एनसीबीच्या अधिकाऱ्यांनी तिला मंगळवारी दुपारी पावणे दोनच्या सुमारास 'व्हिडीओ कॉन्फरन्सिंग'द्वारे एनडीपीएस न्यायालयासमोर हजर केले. त्यानंतर न्यायालयाने तिच्या कोठडीत ६ ऑक्टोबरपर्यंत वाढ केली. शौविकसह अन्य चार आरोपींची न्यायालयीन कोठडीची मुदत आज, बुधवारी संपत असल्याने त्यांच्या कोठडीतही वाढ होण्याची शक्यता आहे.

रियानं जामीन अर्ज दाखल करताना तिच्यावर करण्यात आलेल्या आरोपांबद्दल तिची बाजू मांडली आहे. 'मी सुशांतसोबत कधीही ड्रग्ज घेतले नाही. तो एकटाच ड्रग्ज घेत असे. त्यानं ड्रग्ज मिळवण्यासाठी त्याच्यासोबत राहणाऱ्या आणि त्याच्या जवळील व्यक्तींचा फायदा उचचला. स्वत:चं नाव कुठंही येऊ नये साठी त्यानं नेहमीच त्याच्या आजुबाजूला असणाऱ्या व्यक्तीचा वापर केला', असं रियानं म्हटलं आहे. ड्रग्ज प्रकरणात कुठंही नाव येऊ नये याची त्यानं पुरेपूर काळजी घेतली आहेत. आणि जेव्हा सगळं बिघडलं तेव्हा त्यांच्यावर सगळं टाकून निघून केला', असंही तिनं म्हटलं आहे.

तसंच नारकोटिक्स ब्युरोच्या चौकशीत रियाने सुशांतला ड्रग्ज पुरवल्याचं आणि त्यासाठीचे व्यवहार केल्याचं मान्य केलं. ती स्वतः ड्रग्ज पेडलर्सशी संपर्क करायची आणि भाऊ शौविक चक्रवर्ती आणि दिपेश सावंत यांच्यातर्फे पेडलर्सना पैसे द्यायची. एनसीबीच्या चौकशीत रियानंआणखी बर्‍याच गोष्टींची कबुली दिली आहे. यात रियानं स्पष्ट केलं की, सुशांत कधीही स्वतःकडे ड्रग्ज ठेवायचा नाही. त्याला पकडले जाण्याची नेहमीच भीती वाटत होती.

रिया चक्रवर्तीने एनसीबीला दिलेल्या जबाबात म्हटलं की, सुशांत स्वतःजवळ कधीही ड्रग्ज ठेवायचा नाही. हे ड्रग्ज नेहमी दिपेश सावंत, सॅम्युअल मिरांडाजवळ असायचे. तेच लोक सुशांतला रोल करून जॉइन्ट द्यायचे. रियाच्या ड्रग्ज चॅटमध्येही याचा खुलासा झाला आहे. यात रियाने ग्रुपवर सुशांतसाठी रोल करून द्या असे ऑर्डर दिले होते. याशिवाय दिपेश सावंतनेही आपल्या जबाबात मान्य केलं की तोच सुशांतला जॉइन्ट्स करून द्यायचा.