ऋषी यांच्या मुलीला मिळाली दिल्लीतून मुंबईत येण्याची परवानगी

मुंबई- ज्येष्ठ अभिनेते ऋषी कपूर यांचं आज निधन झालं. ते ६७ वर्षांचे होते. गुरुवारी सकाळी ८ वाजून ४५ मिनिटांनी मुंबईतील इस्पितळात त्यांनी अखेरचा श्वास घेतला. गेल्या दोन वर्षांपासून ते कॅन्सरशी लढा देत होते. दरम्यान, लॉकडाउनच्या नियमांचं पालन करून ऋषी यांच्यावर अंत्यसंस्कार करण्यात येणार आहेत. रिपोर्टनुसार, ऋषी यांचं शव इस्पितळातून थेट स्मशानभूमीत नेण्यात येईल.

ऋषी यांच्या अंतयात्रेत फक्त २० जणांना परवानगी

रिपोर्टनुसार, ऋषी यांच्यावर मरीन लाइन येथील चंदनवाडी स्मशानभूमीत अंत्यसंस्कार करण्यात येतील. स्मशानभूमीच्या आत आणि बाहेरील परिसरात मुंबई पोलिसांकडून कडेकोट बंदोबस्त करण्यात आला आहे. याकाळात सोशल डिस्टन्सिंगचं उल्लंघन होणार नाही याची काळजी घेण्यात येणार आहे. नियमांनुसार त्यांच्या अंतयात्रेला फक्त २० जण उपस्थित राहू शकतात.

इस्पितळात कपूर कुटुंबियातील कोण आहे उपस्थित-

ऋषी यांचं निधन हे संपूर्ण कपूर कुटुंबियांसाठी कधीही न भरून येणारं नुकसान आहे. यातही नीतू कपूर, रणबीर आणि रिद्धिमा यांच्यासाठी हा सर्वात कठीण काळ आहे. रिपोर्टनुसार, कपूर कुटुंबातील अनेकजण यावेळी इस्पितळात उपस्थित आहेत. नीतू कपूर, रणधीर कपूर, राजीव कपूर, रीमा जैन, रणबीर कपूर, करीना कपूर इस्पितळात आहेत. याशिवाय अनेक नातेवाईक अजूनही येत आहेत.

कठीण काळात रणबीरची ताकद झाली आलिया

याशिवाय रणबीर कपूरची गर्लफ्रेंड आलिया भट्टही इस्पितळात उपस्थित आहे. याशिवाय सैफ अली खान, अभिषेक बच्चनही इस्पितळात पोहोचले होते. सूत्रांनी दिलेल्या माहितीनुसार, कपूर कुटुंबियांचे अनेक नातेवाईक दिल्लीत आहेत. ऋषी यांची मुलगी दिल्लीत राहते. गाडीने मुंबईमध्ये येण्यात अनेक अडथळे आहेत. यामुळे रिधिमाने दक्षिण- पूर्व डीसीपी यांच्याकडे मूवमेन्ट पासची परवानगी मागितील. सकाळी १०.३० वाजता रिधिमाला दिल्लीतून मुंबईत येण्याची परवानगी मिळाली.

२४ तासांत कॅन्सरने घेतला दोन दिग्गजांचा जीव

इस्पितळाकडील सर्व रस्ते सील करण्यात आले आहेत. ऋषी यांचे चाहते त्यांच्या अंत्यदर्शनासाठी गर्दी करत आहेत. त्यामुळे पोलिसांनी इस्पितळाच्या बाहेर बॅरिकेडर लावले आहेत. याशिवाय मुंबई पोलिसांनी चाहत्यांना इस्पितळासमोर गर्दी न करण्याचं आवाहनही केलं आहे.