सिद्धी अमेरिकत घेतेय पुढील शिक्षण
सिद्धी शरद पोंक्षे गेल्या साडेचार महिन्यांपासून अमेरिकेतील एका वैमानिक प्रशिक्षण संस्थेमध्ये शिकत आहे. पहिल्यांदाच आई-वडिलांपासून सिद्धी इतक्या दूर आहे. परंतु आपलं स्वप्न पूर्ण करण्यासाठी तिनं आणि तिच्या कुटुंबानं हा निर्णय घेतला. तिच्या स्वप्नाबद्दल सिद्धीला विचारलं असता तिनं सांगितलं की, 'लहान असल्यापासूनच मला वैमानिक व्हायचं होतं. जशी जशी मोठी होत गेले तेव्हा आपण वैमानिकच व्हायचं असा मनाशी ठाम निश्चय केला. तसं घरच्यांनाही सांगितलं. बाबांनी कायम माझ्या स्वप्नांना पाठिंबा दिला. इतकंच नाही तर मला स्वप्न पूर्ण करण्यासाठी लागणारी सर्व मदत केली.'
१२ वीत असताना वडिलांना झालं कर्करोगाचं निदान
सिद्धीनं मुलाखतीमध्ये पुढं सांगितलं की, 'मी मिठीबाई कॉलेजमध्ये १२ वी ला शिकत होते तेव्हा बाबांना कर्करोग झाल्याचं निदान झालं. आम्ही सर्वजण खूप हादरून गेलो. कारण लहान असल्यापासून कॅन्सर हा वाईट असतो हेच मनात ठसलं होतं. परंतु बाबांच्या सकारात्मक विचारांमुळे आम्ही त्या खडतर परिस्थितीमधून बाहेर आलो. बाबा हॉस्पिटलमध्ये असताना मी तिथं जाऊन अभ्यास करायचे. त्यानंतर ते घरी आले तेव्हा मी घरात राहून अभ्यास केला. त्यामुळे त्यांची काळजी घेता आली. बाबांबरोबरच आईमध्ये असलेल्या सकारात्म विचारांमुळे आम्ही या अतिशय कठीण प्रसंगातून बाहेर आलो.'
कशी केली पायलट प्रशिक्षणाची तयारी
सिद्धीनं पुढे सांगितलं की, 'बाबांचा कॅन्सर आणि माझी बारावी अशी तारेवरची कसरत होती. त्या काळात घेतलेल्या मेहनतीचं फळ मिळालं आणि ८२ टक्के गुण मिळवून मी उत्तीर्ण झाले. त्यानंतर मी लगेचच वैमानिक होण्याच्या कोर्सला जाण्याचा निर्णय घेतला. मग त्यासाठी आवश्यक त्या परीक्षा यशस्वीरित्या पास केल्या मग आता मी ज्या प्रशिक्षण संस्थेत शिकते आहे, तिथं अर्ज केला आणि माझी निवड झाली.'
लवकरच होईल कर्मिशिअल पायलट
वैमानिक होण्याचं प्रशिक्षण अतिशय खडतर असतं. त्यात अनेक टप्पे आहेत. त्यातील पहिला टप्पा मी पार केला असून मला खासगी वैमानिक होण्याचा परवाना मिळाला आहे. आता या पुढचे टप्पे मला पार करायचे आहे. ते टप्पे पार केल्यानंतरच मी कर्मिशिअल पायलट होऊ शकेन. आता तर माझ्या स्वप्नांच्या दिशेनं मी पहिलं पाऊल टाकलं आहे.'
मला फक्त वैमानिकच व्हायचं होतं
बाबांसारखं अभिनयाच्या क्षेत्रात यावं असं कधी वाटलं का, असा प्रश्न सिद्धीला विचारला असता तिनं सांगितलं की, 'मला लहान असल्यापासून वैमानिकच व्हायचं होतं. त्यामुळे या क्षेत्रात येण्याचा कधीच विचार माझ्या मनात आला नाही. माझ्या या स्वप्नांची जाणीव बाबांना आणि घरातील इतर मंडळींना होती. त्यामुळे त्यांनी मला कायम पाठिंबा दिला.'
बाबा आणि त्यांच्या विचारांचा अभिमान
शरद पोंक्षे हे कट्टर सावरकरवादी आहेत. ते सातत्यानं त्यांचे विचार सोशल मीडियावरून मांडत असतात. अनेक कार्यक्रमांमध्ये ते भाषणांमधून त्यांचे विचार सर्वांसमोर प्रकट करत असतात. त्यावरून अनेकदा त्यांना टीका सहन करावी लागते. सोशल मीडियावर तर अनेकदा त्यांना ट्रोल केलं जातं, त्याबद्दल काय वाटतं असं सिद्धीला विचारलं असता तिनं सांगितलं की, 'माझ्या बाबांचा आणि त्यांचा विचारांचा मला कायमच अभिमान वाटत आला आहे.'
मर्यादीत इतिहास माहीत आहे
'कारण शाळेत आमच्या नवीन पिढीला जो इतिहास शिकवला जातो, तो खूप मर्यादीत आहे. परंतु इतिहासातील अशा अनेक गोष्टी, अनेक व्यक्तीमत्व आहेत, त्यांच्याबद्दल फारशी माहिती नाही. ही माहिती देण्याचं काम बाबा करत आहेत. जेव्हापासून मला या गोष्टी समजू लागल्या. तेव्हा मी त्यांना अनेक प्रश्न याबद्दल विचारले. तेव्हा त्यांनी माझ्या सर्व शंकांचं मला समेजल अशा शब्दांत निसरन केलं होतं.
ते आमच्यामागे खंबीरपणे उभे
बाबांमुळे आमच्यासारख्या नवीन पिढीला काळाच्या पडद्याआड दडलेल्या इतिहासातील अनेक गोष्टी माहिती होत आहेत. आज माझे अनेक मित्र- मैत्रिणी बाबांच्या पोस्ट आवर्जून वाचतात. त्या वाचल्यानंतर नवी माहिती मिळत असल्याचं सांगतात.' सिद्धी पुढे म्हणाली की, 'बाबांच्या या विचारसरणीमुळे अनेकदा त्यांना धमक्या मिळतात. कधी फोनवरून तर कधी सोशल मीडियावरून. सुरुवातीला आम्हाला त्याची भrती वाटायची. परंतु एक गोष्टी नक्की माहिती होती की बाबा आम्हाला काहीही होऊ देणार नाही. ते आमच्यामागे खंबीरपणं उभा असेल.'
बाबांएवढी आईही तितकीच खंबीर
मटा ऑनलाईनला दिलेल्या मुलाखतीमध्ये सिद्धी जसं तिच्या बाबांबद्दल भरभरून बोलली तसंच तिच्या आईबद्दलही तिनं कृतज्ञता व्यक्त केली. तिनं सांगितलं की, 'बाबा कामाच्या निमित्तानं बाहेर असायचे. तेव्हा माझं आणि माझ्या भावाच्या शिक्षणाकडे आईचं बारीक लक्ष असायचं. तिच्यामुळे मला अभ्यासाची गोडी लागली. आज मी जी काही आहे ते तिच्याचमुळे आहे. बाबांइतकी आईदेखील सकारात्मक विचारांची असल्यानं कधीही निराश वाटू लागतं तेव्हा त्या दोघांशी बोलल्यावर पुन्हा एकदा ऊर्जा मिळते.'