सिद्धू मूसेवाला हत्येच्या मास्टरमाइंडला अटक, गोल्डी ब्रारला कॅलिफोर्नियात पकडलं

मुंबई- पंजाबी गायक सिद्धू मूसेवाला च्या हत्येमागील सूत्रधार गोल्डी ब्रारला कॅलिफोर्नियामध्ये ताब्यात घेण्यात आले आहे. भारताच्या गुप्तचर यंत्रणांच्या सूत्रांकडून ही माहिती मिळाली. मात्र, कॅलिफोर्नियाच्या बाजूने याबाबत भारत सरकारला कोणतीही अधिकृत माहिती देण्यात आलेली नाही.

२९ मे रोजी सिद्धू मूसेवालाची हत्या करण्यात आली होती. त्याच्यावर भर रस्त्यात गोळ्या झाडण्यात आल्याने त्याचा जागीच मृत्यू झालेला. त्याच्या हत्येचाी जबाबदारी कुख्यात गुंड गोल्डी ब्रारने घेतली होती. त्याने लॉरेन्स बिश्नोईसोबत मूसेवालाच्या हत्येचे संपूर्ण नियोजन केले आणि नंतर त्याने ही संपूर्ण हत्या घडवून आणली. याप्रकरणी पोलिसांनी ३४ जणांविरोधात गुन्हा दाखल केला होता.

गोल्डी ब्रारवर १६ हून अधिक केसेस

सतींदरजीत सिंग उर्फ गोल्डी ब्रार हा गँगस्टर लॉरेन्स बिश्नोईचा जवळचा मानला जातो. गेल्या वर्षी पंजाबमधील फरीदकोट जिल्ह्यातील न्यायालयाने युवक काँग्रेसचे नेते गुरलाल सिंग पहेलवान यांच्या हत्येप्रकरणी गोल्डी ब्रारविरुद्ध अजामीनपात्र अटक वॉरंट जारी केले होते. गोल्डी ब्रार १६ हून अधिक गुन्ह्यांसाठी वाँटेड आहे. तो भारतातून कॅनडाला पळून गेला.


रेड कॉर्नर नोटीस जारी करण्यात आली

नुकतीच इंटरपोलने गोल्डी ब्रारविरोधात रेड कॉर्नर नोटीस जारी केली होती. गोल्डीने कॅनडात बसून सिद्धू मूसेवालाच्या हत्येचा कट रचला होता. याप्रकरणी दिल्लीतील तिहार तुरुंगात बंद असलेला गँगस्टर लॉरेन्स बिश्नोई याचीही चौकशी सुरू आहे. गोल्डी आणि लॉरेन्स दोघेही कॉलेजपासून एकत्र आहेत. ब्रारवर खून, हत्येचा प्रयत्न, गुन्हेगारी कट आणि शस्त्रास्त्रांची तस्करी असे अनेक आरोप आहेत.

कोण आहे गोल्डी ब्रार?

पंजाबमधील श्री मुक्तसर साहिब येथे राहणारा सतविंदर सिंग उर्फ गोल्डी ब्रारचा जन्म १९९४ मध्ये झाला. २०१७ मध्ये तो स्टुडंट व्हिसावर कॅनडाला गेला होता. गोल्डीने बीएची पदवी संपादन केली आहे. पंजाब पोलिसांकडे त्याचे ५ वेगवेगळे फोटो आहेत, ते फोटो पाहून तो काही काळानंतर स्वतःचा लुक बदलत असल्याचं दिसून येतं. गोल्डी हा A+ श्रेणीचा गुंड आहे आणि न्यायालयाने त्याला फरारी घोषित केले आहे.

गोल्डी ब्रारवर खून, हत्येचा प्रयत्न, खंडणी यांसारखे गंभीर गुन्हे दाखल आहेत, पंजाबमध्ये गोल्डीविरुद्ध एकूण १६ गुन्हे दाखल आहेत, ज्यामध्ये चारमध्ये तो निर्दोष सुटलेला. कॅनडाला पळून जाण्यापूर्वी गोल्डीच्या गुन्हेगारी कारवाया पंजाबमधील फिरोजपूर आणि श्री मुक्तसर साहिबमधील परिसरात शिगेला पोहोचल्या होत्या.