अभिनेता सोनू सूद यानं घेतली राज्यपाल भगतसिंह कोश्यारी यांची भेट

मुंबई: अभिनेता सोनू सूद यानं आज राज्यपाल भगतसिंह कोश्यारी यांची राजभवन येथे सदिच्छा भेट घेतली. स्थलांतरित लोकांना त्यांच्या मूळ राज्यात पोहचविण्यासाठी केलेल्या प्रयत्नांची सूद यांनी राज्यपालांना माहिती दिली. दोन दिवसांपूर्वी राज्यपालांनी फोन करून कौतुक केलं होतं.

राज्यपालांनी सोनूला फोन केल्यानंतर त्याच्या ट्विटरवर यासंदर्भात ट्विट करण्यात आलं होतं.राज्यपपाल कोश्यारी यांच्या ट्विटला उत्तर देताना सोनूनं त्यांचे आभार मानत तुम्ही केलेल्या कौतुकामुळं काम करण्यासाठी आणखी प्रेरणा मिळाली असल्याचंही त्यानं म्हटलं होतं.

सोनू करत असलेल्या कामाचं सर्वांनीच कौतुक केलं आहे. मजूरांच्या प्रवासारावरून राज्य सरकार आणि केंद्र सरकार यांच्यात वाद सुरू असले तरी राजकीय नेत्यांनी त्यांच्या कामाचं कौतुक केलं आहे. राष्ट्रवादी काँग्रेस पक्षाचे प्रदेशाध्यक्ष आणि राज्याचे जलसंपदामंत्री जयंत पाटील यांनी त्याला 'नायक'म्हटलं आहे. तर भाजप नेत्या स्मृती इराणी यांनी देखील त्याला सलाम ठोकला आहे.
चित्रपटात खलनायकाच्या भूमिका वाखाणल्या गेल्यानंतरही, एखाद्याला प्रत्यक्ष आयुष्यातील कामगिरी कशी जनसामान्यांचे नायकत्व प्रदान करते, याचे सध्याचे उत्कृष्ट उदाहरण म्हणजे अभिनेता सोनू सूद. लॉकडाउनमुळे अडकून पडलेल्या श्रमिकांच्या गळ्यातील तो ताईत बनला आहे. हाताला काम नाही, खायला अन्न नाही, घरी जाण्याची सोय नाही अशा स्थितीत जीव घायकुतीला आलेल्यांसाठी तो देवासारखा धावून आला. या श्रमिकांसाठी केवळ वाहनांची सोय करूनच तो थांबला नाही, तर अन्नपाण्याची व्यवस्था करून, तिकिटाच्या रकमेचीही जबाबदारी त्याने एकहाती उचलली. सोनू सूदचा जन्म लुधियानातील. तो नागपुरात शिकला. मुंबईत स्थायिक झाला. हिंदी, तेलुगू, तमिळ, कन्नड आणि पंजाबी चित्रपटांत त्याने दबंग भूमिका साकारल्या. करोनाच्या तडाख्याने सर्वांनाच अस्वस्थ केले. सोनूने वलयांकित जगातून बाहेर पडत, थेट श्रमिकांशी संपर्क साधला आणि त्यांना गृहराज्यांत पोहोचविण्याच्या कार्यात स्वत:ला झोकून दिले. जन्मभूमी पंजाबमधील दवाखान्यांना पीपीई किट पाठवल्या. कर्मभूमी मुंबईतील स्वत:चे हॉटेल आरोग्य कर्मचाऱ्यांना राहायला दिले.