आरे कारशेडवरून बेजबाबदार ट्वीट केल्यानं सुमीत राघवनवर नेटकरी संतप्त, 'तुम्ही सत्तेचे गुलाम'

मुंबई : गोरेगाव येथील आरे कारशेडवरून वादग्रस्त ठरलेल्या मुंबई मेट्रो ३ प्रकल्पाला अभिनेता सुमीत राघवन यानं पाठिंबा दिला आहे. त्यानं अनेकदा उघडपणे कारशेडला विरोध करणाऱ्यांवर टीका केली आहे. नुकतं सुमीतनं यासंदर्भात ट्विट केलं आहे. त्याचं हे ट्वीट चांगलंच चर्चेत आलं आहे. या ट्वीटमध्ये त्यानं कारशेड विरोधात आंदोलन करणाऱ्या पर्यावरण प्रेमींची खिल्ली उडवली आहे. मात्र सुमीतनं केलेल्या या ट्वीटवरून अनेकांनी संताप व्यक्त केला आहे. तर काही युझरनी त्याला खडेबोलही सुनावले आहेत. या प्रकरणावरून अभिनेता आणि काही नेटकऱ्यांमध्ये शाब्दिक वाद ट्विटरवर झडत आहेत.

काय आहे प्रकरण

अभिनेता सुमीत राघवनने दोन दिवसांपूर्वी एक ट्वीट रिट्विट केलं. त्यात त्यानं एका व्यक्तीचा व्हिडिओ शेअर केला होता. 'फ्रेंचचे नागरिक क्लायमेट चेंज अॅक्टविस्ट लोकांची काळजी घेताना' अशी कॅप्शन दिली होती. व्हिडिओत एक व्यक्ती आंदोलनकर्त्यांना मारताना दिसत आहे. सुमीतनं व्हिडिओ रिट्विट करत लिहिलं की, 'आरेच्या आंदोलकांबरोबर आपणही हेच करायला हवं होतं. डोक्यावर चढले होते, बोगस फालतू लोक. काही कामाचे ना धामाचे... झोलछाप...' असं लिहित त्यानं आरे आंदोलकांची टिंगल उडवली.



सुमीतनं केलेल्या या ट्वीटमुळे नेटकरी प्रचंड संतापले. अनेकांनी सुमीतच्या या ट्वीटला उत्तर देताना त्याला खडेबोल सुनावले. तर काही युझरनी तर तो माणूस म्हणून अत्यंत वाईट असल्याचं म्हणत त्याच्यावर अश्लाघ्य भाषेत टीका केली. एका नेटकऱ्यानं लिहिलं की, 'राघवन साहेब अती होतंय बरं...'

तर आणखी एका युझरनं सुमीतच्या हेतूबद्दल शंका व्यक्त केली. तसंच त्याचं हे वागणं पुरस्कारासाठी असल्याचं म्हटलं. तर अन्य एका नेटकऱ्यानं कमेन्टमध्ये म्हटलं की, 'सुमीत लवकर बरा हो. तू उत्तम नट असशीलही परंतु प्रत्यक्ष आयुष्यात अत्यंत वाईट माणूस आहेस.
तर अन्य एकानं लिहिलं आहे की, 'असे विचार असतील तुमचे माहीत नव्हतं. आजपासून तुमचे सर्व शो, नाटक, चित्रपट बघणं बंद करतोय.'



तर अन्य एका युजरनं सुमीतला ग्रेटाचं काम पाहण्याचा सल्ला दिला आहे. तर आणखी एका नेटकऱ्यानं दिवंगत अभिनेते विक्रम गोखले यांच्यावर आधारीत एक मीम शेअर केले आहे. या मीमवर 'तू नट म्हणून भिकारडा आहेसच, पण तू माणूस म्हणून पण नीच आहेस', असा एक डायलॉग लिहिला आहे.



त्यावर सुमीतनेही त्या युजरला खोचक उत्तर दिलं. त्यानं लिहिलं की, 'शेवटी आधार तुला माझ्याच व्यवसायाचा घ्यावा लागला? स्वतःचं काहीच नसलं की असं होतं. असो. विक्रम काकांना त्या निमित्ताने तू श्रद्धांजली दिली.. मोठा नट होता..'




सुमीतनं दिलेल्या या उत्तरावर त्या नेटकऱ्यानं म्हटलं आहे की, 'तुम्हा दोघांना हा डायलॉग चपखल लागू होतो म्हणून ट्वीट केलं आणि तो बरोबर काळजात लागला आहे, हे तुमच्या बोलण्यावरून दिसत आहे.' त्यानंतर सुमीत आणि त्या युझरमध्ये ट्वीट युद्ध रंगलं. दरम्यान सुमीतनं केलेल्या ट्वीटनंतर अनेक नेटकऱ्यांनी आणि पर्यावरणप्रेमींनी त्याच्यावर टीका केली.