रजनीकांत यांची प्रकृती स्थिर; रुग्णालयातून मिळाला डिस्चार्ज

हैदराबाद : दाक्षिणात्य अभिनेते आणि सुपरस्टार रजनीकांत यांना रुग्णालयातून डिस्चार्ज देण्यात आला आहे. त्यांच्या प्रकृतीत सुधारणा झाली असून प्रकृती स्थिर असल्याचं रुग्णालयाकडून सांगण्यात आलं आहे.

दोन दिवसांपूर्वी उच्च रक्तदाबाचा त्रास जाणवल्यानंतर रजनीकांत यांना रुग्णालयात दाखल करण्यात आलं होतं. रजनीकांत यांच्यावर हैदराबादच्या अपोलो रुग्णालयात उपचार सुरु होते. रुग्णालयाकडून अधिकृतरित्या ही माहिती देण्यात आली होती. रुग्णालयात दाखल केल्यानंतर रजनीकांत यांनी उपचारांना योग्य प्रतिसाद दिल्यानं त्यांची तब्येत स्थिर असल्याचं डॉक्टरांकडून सांगण्यात आलं आहे.

रजनीकांत यांच्या 'अन्नाथे' या आगामी चित्रपटाचं शूटिंग हैदराबादमध्ये सुरू होतं. टीममधील चार सदस्यांना कोरोना विषाणूची बाधा झाल्याचं समजल्यानंतर चित्रपटाचं शूटिंग थांबवण्यात आलं होतं. त्यानंतर रजनीकांत यांनी चेन्नईतील आपल्या फार्महाऊसमध्ये आयसोलेट होण्याचा निर्णय घेतला होता. मंगळवारी त्यांच्या करोना चाचणीचा रिपोर्टही आला होता.

अपोलो रुग्णालयाकडून देण्यात आलेल्या माहितीनुसार, रजनीकांत यांची करोना चाचणीदेखील करण्यात आली होती. या चाचणीत रजनीकांत करोना निगेटिव्ह आढळले होते. परंतु, त्यांच्या रक्तदाबात मात्र चढ-उतार दिसून आल्यानं त्यांना रुग्णालयात हलवण्यात आलं होतं. डॉक्टरांची एक विशेष टीम त्यांच्या प्रकृतीवर लक्ष ठेवून होती. रक्तदाब सामान्य झाल्यानंतर त्यांना रुग्णालयातून डिस्चार्ज देण्यात आलाय.

यापूर्वी, रजनीकांत यांच्यावर मूत्रपिंड प्रत्यारोपणाची (Kidney Transplant) शस्रक्रिया पार पडली होती. ऑक्टोबर महिन्यात रुग्णालयात दाखल करण्यात आलं होतं. रजनीकांत यांच्या शरीरात रोगप्रतिकारक शक्ती कमी झाल्याचं डॉक्टरांना आढळळं होतं. त्यामुळं डॉक्टरांकडून त्यांना करोना काळात बाहेर न पडण्याचा सल्ला देण्यात आला होता.