The Kerala Story वर केदार शिंदेही बोललेच, सिनेमा मोफत दाखवणाऱ्या नेत्यांची काढली खरडपट्टी

मुंबई- अदा शर्मा स्टारर 'द केरळ स्टोरी' हा चित्रपट गेल्या कित्येक दिवसांपासून चर्चेत आहे. सिनेमाचा विषय, त्याचा आलेला टीझर यावरून देशभरात या सिनेमाची चर्चा होत आहे. दिग्दर्शक सुदीप्तो सेनचा हा सिनेमा रिलीज झाला असून पहिल्या दिवसापासून चांगली कमाईही करत आहे. एकीकडे राजकीय नेत्यांनी सिनेमावर बंंदी घालण्यात यावी अशी विनंती केली असताना, महाराष्ट्रात मात्र काही नेते हा सिनेमा फुकट दाखवत असल्याचं मराठी दिग्दर्शकाचं म्हणणं आहे.

आतापर्यंत अनेक हिंदी कलाकारांनी या सिनेमावर भाष्य केलं. पण आता प्रसिद्ध दिग्दर्शक केदार शिंदे यांनीही महाराष्ट्रातली एकंदरीत परिस्थिती पाहत त्यावर आपलं मत व्यक्त केलं आहे. याआधी कंगना रणौत आणि शरद पोंक्षे यांनीही या सिनेमावर आपलं मत दिलं होतं. पण आता केदार यांनी सिनेमावर आपली प्रतिक्रिया व्यक्त केली नसून, महाराष्ट्रातील नेत्यांच्या डोळ्यात अंजन घालण्याचा प्रयत्न केला आहे.


आपल्या मनातील भावना व्यक्त करणारं ट्वीट करत केदार यांनी लिहिलं की, 'दुर्दैव... महाराष्ट्रात 'केरळ स्टोरी' या सिनेमाचे खास शो आपले महाराष्ट्रातले नेते प्रायोजित करून लोकांना मोफत दाखवत आहेत. या महाराष्ट्र दिवसाच्या निमित्ताने 'महाराष्ट्र शाहीर' प्रदर्शित झाला हे या नेत्यांना ठाऊक असेल का? शाहीर साबळे कोण हे तरी माहिती असेल का?'


दरम्यान, ५ मे रोजी प्रदर्शित झालेल्या या सिनेमाने तीन दिवसांत बॉक्स ऑफिसवर मजबूत कमाई केली आहे. सिनेमाने तिसऱ्या दिवशी देशभरात १६.५० कोटींची कमाई केली आहे. पहिल्या दिवशी या सिनेमाने ८ कोटी तर दुसऱ्या दिवशी सिनेमाने १०.५० कोटींची कमाई केली होती. ५० कोटींच्या बजेटमध्ये बनवलेला हा सिनेमा येत्या काळातही अशीच कमाई करेल असा अंदाज वर्तवला जात आहे.