अवघ्या ८ महिन्याच्या मुलीचा दफनविधी झाल्यावर सरोज खान गेल्या होत्या कामाला

मुंबई- बॉलिवूडच्या प्रसिद्ध नृत्यदिग्दर्शिका सरोज खान आज आपल्यात नाहीत. सरोज यांनी बॉलिवूडला एवढी अजरामर गाणी दिली की पुढील अनेक वर्ष ती गाणी विसरणं शक्य नाही. करिअरमध्ये २ हजारांहून अधिक गाण्यांचं नृत्यदिग्दर्शन करणाऱ्या सरोज यांना "The mother of Choreography in India' हा टॅगही चाहत्यांकडून देण्यात आला होता.

सरोज यांच्या व्यावसायिक आयुष्याबद्दल आणि त्यांच्या यशाबद्दल साऱ्यांनाच माहीत आहे. पण त्यांच्या खासगी आयुष्याबद्दल तिथल्या संघर्षाबद्दल आजही अनेकजण अनभिज्ञ आहेत. अनेक संकट अंगावर झेलून सरोज खान यांनी आपली ओळख तयार केली आहे.

चिरंजीवीची महिन्याभरानंतर प्रार्थना सभा; गरोदर पत्नीची भावूक पोस्ट

२०१४ मध्ये दिलेल्या एका मुलाखतीत सरोज यांनी त्यांच्या खासगी आयुष्यातील अनेक आठवणींना उजाळा दिला. वयाच्या अवघ्या १३ व्या वर्षी त्यांनी डान्स मास्टर सोहनलाल यांच्याशी लग्न केलं. सोहनलाल हे सरोज यांच्यापेक्षा जवळपास २८ वर्ष मोठे होते. वयाच्या १४ व्या वर्षी त्यांना मुलगा झाला. मुलाचं नाव त्यांनी राजू (हामिद खान) ठेवलं. यानंतर त्यांना एक मुलगी झाली. पण या मुलीचं आयुष्य अवघ्या ८ महिन्यांचंच होतं. मुलाखतीत सरोज यांनी याच घटनेचा उल्लेख केला होता.

सरोज म्हणाल्या होत्या की, 'माझी मुलगी ८ महिने आणि ५ दिवसांची होती, जेव्हा ती आम्हाला सोडून गेली. दफनविधी झाल्यानंतर त्याच दिवशी संध्याकाळी ५ ची ट्रेन पकडली आणि 'हरे रामा हरे कृष्णा' सिनेमातील 'दम मारो दम' गाण्याच्या चित्रीकरणाला गेले.' सरोज आणि सोहनलाल यांना अजून एक मुलगी झाली. या मुलीचं नाव कुकू असं ठेवण्यात आलं. यानंतर सरोज आणि सोहनलाल वेगळे झाले.

सुशांतच्या बिल्डिंगचं सीसीटीव्ही फुटेज पोलिसांच्या ताब्यात, अभिनेत्याच्या घराबद्दल मिळाली माहिती

सरोज यांनी नंतर सरदार रोशन खान यांच्याशी लग्न केलं. रोशन यांच्यापासून सरोज यांना सुकैना ही मुलगी झाली. २०११ मध्ये सुकैना मुलीचं निधन झालं. मुलीच्या निधनानंतर त्या पूर्णपणे तुटल्या होत्या. अशा परिस्थितीतही सरोज काम करत राहिल्या. सरोज यांच्या कामाबद्दल बोलताना त्यांची मुलगी म्हणाली होती की, आई नेहमी हसायची जेव्हा तिला कळायचं की कलाकार कामातून ब्रेक घेत सुट्टीवर जायचे. आईने तिच्या करिअरमध्ये कधीही सुट्टी घेतली नाही.

बॉलिवूडचे हे पाच फ्लॉप सिनेमे फुकटही कोणी पाहणार नाही

सरोज खान यांना १७ जून रोजी श्वसनाचा त्रास होऊ लागल्यामुळे गुरुनानक इस्पितळता भरती करण्यात आलं होतं. ३ जुलै २०२० रोजी त्यांनी इस्पितळातच अखेरचा श्वास घेतला.