ज्येष्ठ अभिनेते विक्रम गोखले अनंतात विलीन; एका अभिनयपर्वाचा अंत!

पुणे: ज्येष्ठ अभिनेते विक्रम गोखले यांचे वयाच्या ७७ व्या वर्षी निधन झाले. २६ नोव्हेंबर रोजी दुपारी १ वाजून ४५ मिनिटांनी विक्रम गोखले यांची प्राणज्योत मालवली. दरम्यान विक्रम गोखले यांच्या पार्थिवावर पुण्यातील वैंकुठ स्मशानभूमी याठिकाणी अंत्यसंस्कार करण्यात आले. शनिवारी ६ वाजून १६ मिनिटांनी त्यांच्यावर विद्युत दाहिनीत अंत्यसंस्कार करण्यात आले. त्यांच्या अंत्यसंस्कारावेळी कुटुंबीय आणि जवळचा मित्रपरिवार उपस्थित होता. विक्रम गोखले यांच्या पश्चात त्यांची पत्नी आणि दोन मुली असा परिवार आहे. त्यांची एक मुलगी परदेशात असते तर एक मुंबईत वास्तव्याला असते. त्यांच्या शेवटच्या दिवसांमध्ये दोन्ही मुली त्यांच्यासोबत होत्या.

सोशल मीडियावर अभिनेत्याच्या निधनानंतर अनेकांनी पोस्ट करत श्रद्धांजली अर्पण केली आहे. चित्रपट, नाटक, मालिका अशा वेगवेगळ्या प्लॅटफॉर्मवरुन प्रेक्षकांच्या भेटीला येणारं हे अभिनयाचं व्यासपीठ काळाच्या पडद्याआड गेल्याने हळहळ व्यक्त केली जात आहे. वैंकुठ स्मशानभूमीत अंत्यसंस्कारापूर्वी त्यांचे पार्थिव अंत्यदर्शनासाठी बालगंधर्व रंगमंदिर याठिकाणी ठेवण्यात आले होते.

हे वाचा-विक्रम गोखलेंचा तो शेवटचा डायलॉग राहील कायम आठवणीत

कोणत्या आजारामुळे विक्रम गोखलेंचे झाले निधन?

विक्रम गोखलेंना ५ नोव्हेंबर रोजी रुग्णालयात दाखल करण्यात आलं होतं. त्यांच्या पत्नीने याविषय माहिती दिली होती. सुरुवातीला त्यांना श्वसनाचा त्रास झाला आणि त्यांच्या पोटात पाणीही साचलं (जलोदर) होतं. त्यानंतर त्यांचे यकृतही निकामी झाले. गोखले यांच्या प्रकृतीत सुधारणा व्हावी यासाठी डॉक्टरांकडून अथक प्रयत्न केले. त्यांच्या पत्नी वृषाली यांनी अशी माहिती दिली होती की त्यांनी सुरुवातीला उपचाराला चांगला प्रतिसाद दिला होता.

हे वाचा-'विक्रम मी कायम तुझ्यासमोर नतमस्तक होतो', नाना पाटेकरांचा भावुक करणारा फोटो

या दरम्यान त्यांचे एक-एक अवयव निकामी होत गेल्याने विक्रम गोखले यांच्या शरिराने उपचारांना म्हणावा तसा प्रतिसाद दिला नाही. रुग्णालयाने जारी केलेल्या निवेदनानुसार त्यांना शेवटचे काही दिवस व्हेंटिलेटरवरही ठेवण्यात आलं होतं. मात्र २३-२४ नोव्हेंबर दरम्यान त्यांची तब्येत अधिक खालावली. त्यांच्या निधनाचे उलटसुलट वृत्तही पसरले होते. २६ नोव्हेंबर रोजी त्यांची मृत्यूशी सुरू असणारी झुंज अखेर संपली.

अभिनेते विक्रम गोखले यांच्याकडून अभिनयाचे धडे ज्यांनी घेतले, ज्यांनी त्यांच्यासोबत काम केले अशा सर्व कलाकारांनी त्यांना श्रद्धांजली अर्पण केली. केवळ मराठीच नव्हे हिंदी चित्रपटसृष्टीही त्यांच्या जाण्याने हळहळली.