विक्रम गोखलेंची तब्येत पुन्हा खालावली, डॉक्टरांनी दिले Latest Health Update

पुणे- गेल्या काही दिवसांपासून दिनानाथ मंगेशकर रुग्णालयात भरती असलेल्या विक्रम गोखले यांच्या आरोग्याशी निगडीत एक मोठी अपडेट समोर आली आहे. त्यांची प्रकृती पुन्हा खालावल्याचं रुग्णालयाचे जनसंपर्क अधिकारी यांनी माहिती दिली. काल रुग्णालयाकडून दिलेल्या माहितीनुसार गोखले यांच्या प्रकृतीत सुधारणा झाल्याचं सांगण्यात आलं होतं. तसेच त्यांनी डोळे उघडले आणि हात- पाय हलवल्याचंही बोललं जात होतं. तसेच ४८ तासांमध्ये त्यांना व्हेंटिलेटरवरून हटवण्यात येईल. मात्र आता त्यांची तब्येत खालावल्याने व्हेंटिलेटर हटवणार नसल्याचं रुग्णालयाकडून सांगण्यात आलं.

विक्रम गोखले यांनी उघडलेले डोळे

रुग्णालयाचे जनसंपर्क अधिकारी शिरीष याद्गीकर यांनी काल घेतलेल्या पत्रकार परिषदेत सांगितलं होतं की, 'विक्रम गोखले यांच्या प्रकृतीत आश्वासक सुधारणा होत आहे. ते उपचारांना प्रतिसाद देत असून त्यांनी डोळे उघडले आणि हात- पायही हलवले. तसेच पुढील ४८ तासात त्यांचा व्हेंटिलेटर सपोर्ट काढण्यात येईल. तसेच त्यांचा रक्तदाब आणि हृदयाची क्रिया स्थिर आहे.' दरम्यान, गोखले यांच्यावर क्रिटिकल केअर यूनिटमध्ये उपचार केले जात आहेत.

रक्तदाबाचं औषध सुरू

कालपर्यंत गोखले यांचा रक्तदाब सामान्य होता. मात्र आज त्यांच्या रक्तदाबात बदल आढळल्यामुळे त्यांच्या रक्तदाबाची औषध सुरू करण्यात आली आहेत.

अफवांवर विश्वास नको

बुधवारी दुपारी विक्रम गोखले यांची तब्येत खालावल्याने त्यांना रुग्णालयात भरती करण्यात आले. त्यानंतर रात्रीपर्यंत त्यांच्या निधनाची अफवा वणव्यासारखी सोशल मीडियावर पसरली. त्यानंतर अभिनेत्याच्या पत्नी वृषाली यांनी माहिती देत हे वृत्त फेटाळून लावले. त्यांच्या मुलीनेही विक्रम गोखलेंची तब्येत चिंताजनक असल्याचे म्हटले. विक्रम यांचे कौटुंबिक मित्र राजेश यांनी दिलेल्या माहितीनुसार विक्रम गोखले यांचे अनेक अवयव निकामी झाले आहेत.