मुंबई- प्रसिद्ध संगीतकार आणि गायक एआर रहमान यांची मुलगी खतीजाला तिच्या पेहरावावरून ट्रोल करण्यात आलं होतं. लेखिका तस्लीमा नसरीन यांनी खतीजाच्या बुरखा घालण्यावर प्रश्न उपस्थित केले होते. यानंतर खतीजानेही सोशल मीडियावर प्रत्युत्तर दिलं होतं. आता याच प्रकरणावर एआर रहमान यांनीही त्यांचं मत व्यक्त केलं आहे.
बुरखा प्रकरण- रहमानच्या मुलीचं तस्लीमांना ...
एका मुलाखतीत रहमान म्हणाले की, मुलांचं पालन पोषण करताना त्यांना योग्य अयोग्य गोष्टी सांगणं महत्त्वाचं आहे. रहमान पुढे म्हणाले की, खतीजा या प्रकरणावर स्वतःचं मत देण्यापूर्वी कुटुंबाशी बोलली नव्हती. खतीजाने स्पष्ट सांगितलं की, बुरखा घालणं ही तिची पसंती आहे.
बुरख्यावर आपलं मत देताना रहमान म्हणाले की, जर त्यांना बुरखा घालण्याची संधी मिळाली असती तर त्यांनी आनंदाने ती घेतली असती. एका पुरुषाकडून बुरखा घालण्याची अपेक्षा केली जात नाही, नाही तर त्यांनी बुरखा नक्की घातला असता. यामुळे कोणत्याही दुकानात जाऊन बुरखा घेण्याचं स्वातंत्र्य मिळेल. खतिजाला बुरखा घातल्यावर असंच स्वातंत्र्य मिळतं.
तस्लीमा नसरीनचं ट्वीट
तस्लीमा यांनी ट्वीट करत म्हटलं की, 'मला एआर रेहमान यांचं संगीत फार आवडतं. पण जेव्हाही मी त्यांच्या मुलीला पाहते तेव्हा मला घुसमटल्यासारखं होतं. एका सुसंस्कृत शिक्षित घरातल्या महिलांचं कशा सहस पद्धतीने ब्रेनवॉश करता येऊ शकतं.'
खतीजा रहमानचा पलटवार-
तस्लीमा यांच्या याच ट्वीटला उत्तर देताना खतीजाने सोशल मीडियावर एक पोस्ट शेअर करत लिहिले की, 'फक्त एकच वर्ष झालं आहे आणि या मुद्द्याने पुन्हा डोकं वर काढलं. देशात एवढं काही घडत आहे आणि लोकं या गोष्टीने चिंतीत आहेत की महिला कोणता पोशाख वापरतात. माझ्या आयुष्यात मी जे निर्णय घेतले त्यावर मला कोणताही पश्चाताप नाही. मी फार आनंदी आहे आणि मी जे करत आहे त्या सर्व गोष्टींचा मला अभिमान आहे. यासोबतच त्या सर्व लोकांचे मनापासून आभार ज्यांनी मला अशाप्रकारे स्वीकारलं आहे.'
आपल्या पोस्टमध्ये खतीजा रहमानने पुढे लिहिले की, 'प्रिय तस्लीमा नसरीन. मला हे वाचून वाईट वाटलं की तुम्हाला माझा पेहराव पाहून घुसमटल्यासारखं होतं. कृपया शुद्ध हवेत जा. कारण मला या पोशाखामुळे अजिबात घुसमटल्यासारखं वाटत नाही. याउलट मी ज्या गोष्टीसाठी उभी आहे त्याचा मला अभिमान आहे. तुम्ही जर गूगल करून स्त्रीवादी असणं म्हणजे काय याचा अर्थ समजून घ्या. कारण याचा अर्थ दुसऱ्या महिलांना कमी लेखणं नाही आणि दुसऱ्यांच्या वडिलांना वादाच्या मध्ये आणणं असाही स्त्रीवादाचा अर्थ नाही.'