अभिनेत्री श्रीदेवी यांच्या दुबईत झालेल्या अकस्मात निधनाची बातमी कळताच कपूर कुटुंबीयांची भेट घेण्यासाठी विविध ठिकाणांहून धाव घेतलेल्यांपैकी एक होते, पाकिस्तानी कलाकार अदनान सिद्धिकी. अदनान सांगतात, "'श्रीदेवींच्या निधनाची बातमी कळाली तेव्हा मी दुबईतच होतो. मी लगेचच बोनी कपूर यांना भेटण्यासाठी हॉटेल इमिरेट्स टॉवरवर पोहोचलो आणि बोनीजींच्या खोलीत गेलो तेव्हा पाहिलं तर ते अक्षरशः एका लहान मुलाप्रमाणे रडत होते.''
श्रीदेवींचा शेवटचा सिनेमा ठरलेला 'मॉम' या चित्रपटात अदनान सिद्धिकी यांनी श्रीदेवींसोबत त्यांच्या पतीची भूमिका साकारली आहे. ते सांगतात, ''एका पत्रकाराने श्रीदेवींच्या निधनाची बातमी खरी आहे का, हे जाणून घेण्यासाठी मला रात्री ११ वाजता फोन केला तेव्हाच असं काही घडलंय हे मला कळालं. त्यानंतर मी लगेचच बोनी कपूर यांना फोन केला आणि कपूर कुटुंबीय ज्या हॉटेलवर थांबले होते, तिथे जाण्यासाठी निघालो. हॉटेलवर पोहोचलो तेव्हा पाहिलं की, दुबईतील काही अधिकारी बोनीजींची चौकशी करत होते. श्रीदेवींचा मृत्यू हॉटेलच्या ज्या रूममध्ये झाला ती रूमही सील करण्यात आली होती. साधारण तासभर हॉटेलच्या लॉबीमध्येच मला वाट पाहावी लागली. त्यानंतर बोनी कपूर यांच्यासोबत कुटुंबीय आणि जो मित्रपरिवार होता, त्यांनी मला भेटण्यासाठी वर बोलावून घेतलं. मी तिथे पोहोचलो आणि पाहिलं की बोनीजी एका लहान मुलाप्रमाणे ओक्साबोक्सी रडत होते. त्यांच्यावर दुःखाचा डोंगरच कोसळला होता. मी सकाळी ५ वाजेपर्यंत बोनींजींसोबत थांबलो. "