'बरेली की बर्फी'ने जमवला १३ कोटींचा गल्ला

मटा ऑनलाइन वृत्त । मुंबई

कृती सेनॉन, आयुष्मान खुराना, राजकुमार राव यांच्या 'बरेली की बर्फी' या चित्रपटाला प्रेक्षकांचा चांगलाच प्रतिसाद मिळत आहे. आत्तापर्यंत या चित्रपटानं १३.३७ कोटींची कमाई केली आहे.

१८ ऑगस्टला प्रदर्शित झाल्यावर 'बरेली की बर्फी' या चित्रपटानं पहिल्याच दिवशी २.४२ कोटींची कमाई केली तर शनिवारी ३.९५ कोटी, रविवारी ५.१५ कोटी आणि सोमवारी १.८५ कोटींचा गल्ला जमवला आहे. अश्विनी अय्यर यांनी हा चित्रपट दिग्दर्शित केला असून समीक्षकांकडून त्यांच कौतुक होतयं.

बरेली इथं राहणारी बिट्टी मिश्रा म्हणजे क्रिती सेनॉन ही तरुणी तिला येणारी विक्षिप्त स्थळं पाहून वैतागलेली असते. तिच्या हाती लागलेलं 'बरेली की बर्फी' हे पुस्तक वाचून ती पुस्तकाचा लेखक प्रीतम विद्रोही(राजकुमार राव)च्या प्रेमात पडते. पण, हा लेखक कोण, कुठला हे शोधण्यासाठी ती घराबाहेर पडलेली असताना तिला प्रिंटींग प्रेसचा मालक चिराग दुबे ( आयुष्मान खुराना) भेटतो. मग या लव्ह ट्रँगलची कथा विनोदाच्या अंगाने कशी फुलत जाते, त्याची कहाणी म्हणजे बरेली की बर्फी हा चित्रपट आहे.

एकही मोठा स्टार नसून देखील हा चित्रपट प्रेक्षकांचं मनोरंजन करण्यात यशस्वी ठरला आहे. त्यामुळं प्रेक्षकांचा असाच उत्तम प्रतिसाद मिळाला तर बॉक्स ऑफिसवर 'बरेली की बर्फी' ची चव आणखी गोड होण्याची शक्यता आहे.