'सैराट' सुस्साट; दोन दिवसांत कमावले ७ कोटी

मटा ऑनलाइन वृत्त । मुंबई

तरुणाईसह राज्यातील बच्चेकंपनीला आणि आजी-आजोबांनाही 'झिंग झिंग झिंगाट'च्या तालावर ठेका धरायला लावणारा 'सैराट' तिकीटबारीवरही सुस्साट सुटला आहे. दोन दिवसांत या सिनेमानं ७.३५ कोटी रुपयांची कमाई केली आहे.

'फँड्री'तून समाजव्यवस्थेवर दगड भिरकावल्यानंतर सर्जनशील आणि संवेदनशील दिग्दर्शक नागराज मंजुळेनं 'सैराट'मधून पुन्हा जातीव्यवस्थेवर भाष्य केलंय. परशा आणि आर्चीच्या अल्लड-निखळ प्रेमाच्या माध्यमातून त्यानं हा गंभीर विषय हाताळलाय आणि तो प्रेक्षकांना भावलाय. अजय-अतुलचं संगीत, थिरकायला लावणारी गाणी आणि जबरदस्त प्रमोशनमुळे या सिनेमाची सगळेच आतूरतेनं वाट बघत होते. शुक्रवारी आणि शनिवारी सिनेरसिकांनी थिएटर गाठली. या दोन दिवसांत 'सैराट'नं अनुक्रमे ३.५५ कोटी आणि ३.८० कोटींचा गल्ला जमवला आहे. सैराटची 'माउथ पब्लिसिटी'ही जोरात सुरू असल्यानं अनेक थिएटरवर 'हाउसफुल्ल'चा बोर्ड झळकतोय. त्यामुळे 'सैराट' एकूण किती कमाई करतो, याबद्दल उत्सुकता आहे.

गेल्या काही काळात अनेक मराठी सिनेमांनी कोटीच्या कोटी उड्डाणे घेतली आहेत. त्यात नाना-महेश जोडीचा 'नटसम्राट' अव्वल क्रमांकावर आहे.

मराठी सिनेमांची 'सैराट' कामगिरी

* नटसम्राट – ४० कोटी * लय भारी – ३८ कोटी * टाईमपास – ३२ कोटी * कट्यार काळजात घुसली – ३१ कोटी * टाईमपास २ – २८ कोटी * दुनियादारी : २६ कोटी