'सुलतान'ची पाच दिवसांत १८१ कोटींची कमाई!

मटा ऑनलाइन वृत्त । मुंबई

सुपरस्टार सलमान खानने पुन्हा एकादा स्वतःला 'वेनस्डे किंग' असल्याचे दाखवून दिले आहे. नुकत्याच प्रदर्शित झालेल्या सलमानच्या 'सुलतान' चित्रपटाने तिकीट बारीवर पाच दिवसांत तब्बल १८१.६ कोटींची कमाई केली आहे.

आतापर्यंत ईदच्या मुहूर्तावर प्रदर्शित झालेल्या सलमानच्या प्रत्येक चित्रपटानं बॉक्स ऑफिसवर घसघशीत कमाई केली आहे. 'सुलतान' देखील त्याला अपवाद नाही. 'सुलतान'ने पहिल्या तीन दिवसातच 'बजरंगी भाईजान' चित्रपटाचे विक्रम मोडला होता. गेल्या वर्षी प्रदर्शित झालेल्या या चित्रपटाने तीन दिवसांत १०२.६ कोटींची कमाई केली होती. तर 'सुलतान'ने १०५.३४ कोटींची कमाई करत नवा विक्रम प्रस्थापित केला.

त्यानंतर पहिल्या चार दिवसांच्या कमाईत देखील 'सुलतान'ने 'बजरंगी भाईजान'ला मागे टाकले. 'बजरंगी भाईजान'ने चार दिवसात १२९.६५ कोटींची कमाई केली होती. तर 'सुलतान'ने १४२.६२ कोटींची कमाई केली. आता 'सुलतान'ने रविवारी ४० कोटींची कमाई करत भारतीय बॉक्स ऑफिसवरील सर्व विक्रम मागे टाकले. पहिल्या पाच दिवसांची घोडदौड पाहता 'सुलतान' १-२ दिवसातच २०० कोटींच्या क्लबमध्ये करेल.

आमिरला मागे टाकणार का?

'सुलतान'ने तिकीट बारीवर केलेली विक्रमी कमाई पाहता हा चित्रपट सर्व रेकॉर्ड मोडीस काढेल असा अंदाज व्यक्त केला जात आहे. पहिल्या आठवड्यातील कमाईचा विचार केल्यास हा विक्रम आमिर खानच्या नावावर आहे. त्याच्या 'धूम३' या चित्रपटाने पहिल्या आठवड्यात १८८.९ कोटींची कमाई केली होती. तर दुसऱ्या स्थानावर सलमानच्या 'बजरंगी भाईजान'चा क्रमांक लागतो. या चित्रपटाने १८४.६२ कोटी कमावले होते. तर तिसऱ्या स्थानावर आमिरच्या 'पिके'चा क्रमांक लागतो. 'पिके'ने पहिल्या आठवड्यात १८३.०९ कोटी कमावले होते.