केजरीवाल यांच्यावरील पिक्चरचा ट्रेलर लाँच

मटा ऑनलाइन वृत्त । मुंबई

आम आदमी पार्टीचे नेते आणि दिल्लीचे मुख्यमंत्री अरविंद केजरीवाल यांच्यावरील डॉक्युमेंट्री फिल्मचा ट्रेलर लाँच झाला आहे. 'अॅन इन्सिग्निफिकंट मॅन' असं या डॉक्युमेंट्री फिल्मचं नाव आहे. या चित्रपटात केजरीवाल यांच्या समाजकारणापासून ते राजकारणापर्यंतचा प्रवास उलगडवून दाखविण्यात आला आहे.

विनय शुक्ला आणि खुशबू रांका यांनी या चित्रपटाची निर्मिती केली आहे. हा नॉन फिक्शनल राजकीय चित्रपट असल्याचा दावा या दोघांनी केला आहे. या डॉक्युमेंट्रीतील ट्रेलरची सुरुवात अरविंद केजरीवाल यांच्यापासून होते. ते सुरूवातीलाच आपलं नाव सांगतात आणि मग सिनेमा सुरू होतो. ट्रेलरमध्ये आम आदमी पक्षाच्या स्थापनेपासून ते केजरीवाल यांना आलेल्या राजकारणातील चढ-उतारांचा मागोवा घेण्यात आला आहे. चित्रपटाच्या पहिल्या भागात पक्षावर लागलेले भ्रष्टाचाराचे आरोप आणि केजरीवाल यांच्यावर झालेली शाई फेक आदी गोष्टी दाखविण्यात आल्या आहेत. या ट्रेलरमध्ये योगेंद्र यादव यांच्यावरही प्रकाशझोत टाकण्यात आला आहे. त्यांच्या 'स्वराज पार्टी'च्या निर्मितीची प्रक्रियाही दाखविण्यात आली आहे.

येत्या १७ नोव्हेंबर रोजी हा चित्रपट प्रदर्शित होणार आहे. अमेरिका मीडिया कंपनी वाइस हा चित्रपट प्रदर्शित करणार आहे. हा चित्रपट नुसता चित्रपट नाही तर तो मास्टर पीस असल्याचा दावा या कंपनीने केला आहे. केवळ भारतातच नव्हे तर जगभरात हा चित्रपट प्रदर्शित करण्यात येणार आहे. त्यासाठी निर्माते आनंद गांधी यांच्या कंपनीशी भागीदारी करण्यात येणार असल्याचं कंपनीनं स्पष्ट केलंय.


मी हा चित्रपट टोरँटो इंटरनॅशनल फिल्म फेस्टिव्हल २०१६ मध्ये पाहिला. मार्शल करी यांच्या 'स्ट्रीट फाइट' या चित्रपटानंतरची ही अत्यंत वास्तववादी डॉक्युमेंट्री असल्याची माझी खात्री पटली आहे, असं या चित्रपटाच्या कार्यकारी निर्मात्या जेसन मोजिका यांनी सांगितलं.