प्रकाश झा यांच्या 'लिपस्टिक'ला सेन्सॉरचा नकार

निर्माता-दिग्दर्शक प्रकाश झा यांच्या 'लिपस्टिक अंडर माय बुरखा' या चित्रपटाला प्रमाणपत्र देण्यास सेन्सॉर बोर्डाने नकार दिला आहे. चित्रपटातील आक्षेपार्ह भाषा आणि काही दृष्यांवर सेन्सॉरने प्रश्न उपस्थित केले आहेत.

गेल्या वर्षी झा यांच्या 'जय गंगाजल' या सिनेमालाही प्रमाणपत्र देण्यास सेन्सॉरने नकार दिला होता. त्याविरोधात झा यांनी 'फिल्म सर्टिफिकेशन अॅपिलेट ट्रिब्युनल' (FCAT) कडे धाव घेतली होती. आता पुन्हा झा यांना 'लिपस्टीक अंडर माय बुरखा' या चित्रपटाचे प्रमाणपत्र मिळवण्यासाठी सेन्सॉरचा सामना करावा लागतोय.

प्रकाश झा निर्मित आणि दिग्दर्शक अलंक्रीता श्रीवास्तव यांच्या 'लिपस्टीक अंडर माय बुरखा' या सिनेमाचे गेल्या महिन्यात सोन्सॉर बोर्डाच्या परीक्षण समितीसमोर स्क्रिनिंग झाले. यानंतर समितीने चित्रपटाबाबत काही आक्षेप नोंदवले आहेत. चित्रपटातील कथा महिला आणि तिच्या जीवनाशी संबंधित आहेत. तसंच काही सेक्स सीन, अक्षेपार्ह शब्द, अश्लील संवाद आणि एका विशिष्ट समाजाशी संबंधित असल्याने हा चित्रपट संवेदनशील बनला आहे. त्यामुळे 1(a), 2(vii), 2(ix), 2(x), 2(xi), 2(xii) and 3(i) या नियमानुसार चित्रपटाला प्रमाणपत्र नाकारत असल्याचं सेन्सॉर बोर्डाने स्पष्ट केलं आहे.

'आपल्या देशात प्रत्येकाला अभिव्यक्ती स्वातंत्र्य आहे. पण सेन्सॉर बोर्ड अशा चित्रपटांना प्रमाणपत्र नाकारून चित्रपट निर्मात्यांचे खच्चीकरण करून त्यांचे अभिव्यक्ती स्वातंत्र्य दडपण्याचा प्रयत्न करत आहे', असा आरोप प्रकाश झा यांनी सेन्सॉर बोर्डावर केला आहे. 'विद्यमान समाजिक परिस्थितीला आव्हान देणारा आणि प्रेक्षकांना भावेल असा हा 'लिपस्टीक अंडर माय बुरखा' चित्रपट आहे, असं सध्या लंडनमध्ये असलेल्या झा यांनी सांगितलं.