ढोलांच्या तालावर सेलिब्रिटी नाचे

अक्षय ढवण, कॉलेज क्लब रिपोर्टर

गणेशोत्सवामध्ये ढोल-ताशा पथकांचा जोरदार आवाज घुमतोय. भल्याभल्यांना आपल्या तालावर नाचण्यास भाग पाडणाऱ्या या पथकांच्या प्रेमात सेलिब्रिटी मंडळीसुद्धा आहेत.

गणेशोत्सवामध्ये ढोल-ताशा पथकांचा जोरदार आवाज घुमतोय. भल्याभल्यांना आपल्या तालावर नाचण्यास भाग पाडणाऱ्या या पथकांच्या प्रेमात सेलिब्रिटी मंडळीसुद्धा आहेत. सुपरस्टार सलमान खानच्या घरी येणाऱ्या, दीड दिवसाच्या बाप्पाच्या विसर्जन मिरवणुकीत मुंबईच्या वंदन ढोल-ताशा पथकाने जोरदार वादन करुन मिरवणुकीला उपस्थित कलाकारांना आपल्या तालावर नाचायला लावलं होतं. स्वतः सलमान गणरायाच्या विसर्जन मिरवणुकीला नव्हता. पण सोहेल खान, डेझी शाह, ॲनी जॅक्सन, नवाजुद्दिन सिद्दीकी या कलाकारांनी ढोल-ताशांच्या ठेक्यांवर ताल धरला होता. गावठी, एक ठोका, कच्छी, ढोली बाजा, गरबा, ड्युअल थीफ, लुंगी यांसारखे अनेक नवनवीन ताल वाजवून वंदन ढोल-ताशा पथकाने सगळ्यांची मनं जिंकली.

उद्योगसम्राट अंबानी यांच्या गणपतीचा आगमन सोहळादेखील वंदन ढोल-ताशा पथकानेच गाजवला. खुद्द नीता अंबानी यांना ढोल-ताशांच्या तालावर मनमुरादपणे नाचण्याचा मोह आवरला नाही. गावठी, कच्छी व ढोलीबाजा या तालांवर त्या नाचताना दिसल्या. वादन झाल्यानंतर नीता यांनी ढोल-ताशा पथकातल्या वादकांची जातीने विचारपूस केली. त्यांच्याबद्दल जाणून घेतलं. सेलिब्रिटींकडून झालेल्या कौतुकामुळे ढोल-ताशा पथकांचे वादकही खूशीत आहेत.