'पद्मावती'ला झटपट प्रमाणपत्र नाहीच!

मटा ऑनलाइन वृत्त । मुंबई

पद्मावती चित्रपटाच्या निर्मात्यांना सेन्सॉर बोर्डाने आणखी एक धक्का दिला आहे. 'पद्मावती'ला प्रमाणपत्र देण्याची प्रक्रिया वेगाने करण्यात यावी, अशी मागणी निर्मात्यांकडून करण्यात आली होती मात्र ही मागणी सेन्सॉर बोर्डाने धुडकावली आहे.

सेन्सॉर बोर्ड नियमांच्या चौकटीत राहूनच या चित्रपटाला प्रमाणपत्र देणार आहे. आमच्याकडे आलेले अर्ज त्या त्या क्रमानेच पडताळले जातील, असे सेन्सॉर बोर्डाकडून स्पष्ट करण्यात आले आहे. त्यामुळे पद्मावती चित्रपटाच्या प्रदर्शनाचा मुहूर्त आणखी लांबण्याची शक्यता आहे.

दरम्यान, पद्मावती चित्रपटात इतिहास तोडूनमोडून दाखवण्यात आल्याचा आरोप राजपूत करणी सेनेसह काही राजकीय पक्षाच्या नेत्यांकडूनही करण्यात आला आहे. हा चित्रपट आहे तसा प्रदर्शित करण्यास या सर्वांचाच विरोध आहे. त्याचवेळी हा चित्रपट सेन्सॉरच्याही कात्रीत सापडल्याने निर्मात्यांच्या चिंतेत भर पडली आहे. आता सेन्सॉर बोर्डाचे प्रमाणपत्र मिळाल्यानंतरच हा चित्रपट प्रदर्शित होऊ शकणार असून निर्माता कंपनी व्हायकॉम १८ मोशन पिक्चर्सने चित्रपटाला लवकरच प्रमाणपत्र मिळेल व प्रदर्शनाची प्रतीक्षा संपेल, असा विश्वास व्यक्त केला आहे.