प्रिया प्रकाशचं ते गाणं इस्लामविरोधी नाही: दिग्दर्शक

नवी दिल्ली:

प्रिया प्रकाशच्या लाजवाब अभिनयामुळं हिट झालेलं 'उरू अदार लव्ह' या चित्रपटातील गाणं इस्लामविरोधी असल्याचा आक्षेप चित्रपटाचे दिग्दर्शक ओमर लूलू यांनी फेटाळून लावलाय. उलट हे गाणं प्रेषित मोहम्मद पैगंबरांचं कौतुक करणारं आहे,' असं त्यांनी म्हटलंय.

'उरू अदार लव्ह' या चित्रपटातील ‘मानिका मलियारा पूवी’ हे गाणं मुस्लिम धर्मीयांच्या भावना दुखावणारं आहे, अशी तक्रार हैदराबादेतील काही तरुणांनी केली होती. यात मोहम्मद पैगंबर आणि त्यांच्या पत्नीचा आक्षेपार्ह उल्लेख आहे. एखाद्या रोमॅन्टिक गाण्यात पैगंबरांचा उल्लेख होणं आमच्यासाठी अपमानास्पद आहे, असं तक्रारकर्त्यांचं म्हणणं होतं. दिग्दर्शक लूलू यांनी हे सगळे आरोप फेटाळून लावलेत. 'हे गाणं रोमॅन्टिक नसून पारंपरिक मुस्लिम गाणं आहे. काही विशिष्ट समारंभात गायलंही जातं. व्हिडिओतील काही दृश्यांमुळं ते रोमॅन्टिक आहे असं वाटतं. परंतु, या गाण्यात इस्लामविरोधी काहीच नाही,' असं त्यांनी म्हटलंय.