ग्लॅमरची हंडी थंडीच

मुंबई टाइम्स टीम

दहीहंडी आणि कलाकार यांचं नातं अतूट असलं, तरी कोर्टाच्या निर्बंधामुळे अनेक कलाकारांनी दहीहंडी आयोजनापासून दूर राहणंच पसंत केलंय. शिवाय, उत्सवात कलाकारांच्या नाचगाण्यांच्या कार्यक्रमांवरही दहीहंडी समन्वय समितीने आक्षेप घेतला आहे. काहींनी तर कलाकारांच्या येण्यामुळेच दहीहंडी उत्सवाचं बाजारीकरण होत असल्याचा आरोप केला आहे. ग्लॅमरच्या दुनियेत यावरुन नेमके काय पडसाद उमटले आहेत याचा ‘मुंटा’ने घेतलेला हा आढावा

कोर्टाने घातलेले निर्बंध आणि काही दहीहंडी मंडळांनीच घेतलेल्या आक्षेपांमुळे दहीहंडी सणाचा माहोल यंदा थंडच राहणार असल्याचं चित्र आहे. दरवर्षी लोकांच्या आकर्षणाचा विषय ठरणारी दादरची आयडियलजवळची दहीहंडी मात्र होणार असल्याचं कळतं. या दहीहंडीला यंदा स्टार प्रवाह चॅनेलवरील मालिकांतले कलाकार हजेरी लावणार आहेत. कोर्टाचे नियम पाळूनच ही दहीहंडी होणार असल्याचं सांगण्यात आलं. ही दहीहंडी वगळता इतर ठिकाणी मात्र कलाकार अभावानंच दिसतील अशी शक्यता आहे.

कलाकारांची घागर उताणी

दरवर्षी दहीहंडीचे अनेक आयोजक ठराविक कलाकारांच्या नाच-गाण्यांच्या कार्यक्रमांसाठी वेगळं बजेटच ठेवतात. पण यंदा कोर्टाचे निर्बंध आणि दहीहंडी मंडळांच्या आक्षेपांमुळे काही आयोजकांनी हे कार्यक्रमच रद्द केले आहेत. गेली अनेक वर्षे मी इव्हेंट्स करतोय. पण असं चित्र पहिल्यांदाच पाहतोय. अनेक कलाकारांनी अतिशय कमी बजेटमध्ये कार्यक्रम करण्याची तयारी दर्शवली आहे. पण आयोजकांनी अजून कलाकारांच्या स्टेजवरील उपस्थितीबाबत निर्णय घेतलेला नाही. अनेक मोठ्या साऊंड कंपन्यांनीही दहीहंडी आयोजनापासून लांब राहणंच पसंत केलंय. त्यामुळे छोट्या साऊंड सिस्टिमवरच यंदाचा उत्सव साजरा होण्याची शक्यता आहे.

संदीप वेंगुर्लेकर, प्रमुख, साइट अँड शेड इव्हेंट्स

बॉलिवूडकरही लांबच?

दहीहंडीचा सण आणि बॉलिवूडकरांचं घट्ट नातं आहे. हा सण साजरा करण्यासाठी शाहरुख खान, सलमान खान, हृतिक रोशन, श्रद्धा कपूर, शिल्पा शेट्टी यांसारखे बडे स्टार्स दरवर्षी वेगवेगळ्या मंडळांना भेटी देतात. कधी दोस्तीखातर तर कधी सुपारी घेऊन हे स्टार्स दहा-पंधरा मिनिटांसाठी का होईना हजेरी लावून जातात. चित्रपटाच्या प्रमोशनसाठीही ही भेट असते. अगदी पाच लाखांपासून एक कोटीपर्यंतची रक्कम मंडळांकडून मोजून घेत असल्याचं समजतं. यंदा कोर्टाच्या निर्णयामुळे मात्र कलाकारांसाठी हा उत्सव थंडा जाणार आहे. या वर्षी जन्माष्टमीच्या मुहूर्तावर 'अ फ्लाईंग जाट' प्रदर्शित होणार असल्यानं, यात प्रमुख भूमिकेत असलेल्या टायगर श्रॉफ आणि जॅकलिन फर्नांडिस यांच्यासह दिग्दर्शक रेमो डिसूझा याला अपवाद ठरण्याची शक्यता आहे. ही टीम काही ठराविक मंडळांना भेटी देणार असल्याचं प्रोडक्शन हाऊसकडून समजतं.

वैयक्तिक प्रश्न

गेल्या काही वर्षांत दहीहंडी सणाला स्पर्धेचं स्वरूप आलं आहे. कोणत्याही गोष्टीचा अतिरेक झाला की त्यावर निर्बंध लादण्याचे प्रयत्न होतात. दहीहंडीच्या बाबतीतही असंच होतंय. दरवर्षी वेगवेगळे नियम त्यासाठी लागू केले जाताय. यंदाही असे काही नियम नव्याने आलेत. कलाकारांनी हंड्यांना जावं की नाही, मंडळांनी त्यांना बोलवावं की नाही हा खूप वैयक्तिक प्रश्न आहे असं मला वाटतं. मी कॉलेजमध्ये असल्यापासून दहीहंडीमध्ये सहभागी होतोय. त्यामुळे अनेक मंडळांमध्ये माझे मित्र आहेत. ते त्यांच्याकडे मला बोलावतात. मग मी तिथे का जाऊ नये? कलाकार म्हणून जाण्यापेक्षा मी तिथे त्यांचा मित्र म्हणून जात असतो.

- संतोष जुवेकर, अभिनेता

बिघडलं कुठे?

दहीहंडी असो किंवा आणखी कुठलेही सण, आम्हा कलाकारांसाठी हे आमच्या फॅन्सना थेट भेटण्याचं एक उत्तम माध्यम आहे. दहीहंडी मंडळं आम्हा कलाकारांना प्रेक्षकांसमोर घेऊन जातात. आम्हीही कलाकार म्हणून त्याचा आनंद घेतोच. पण माणूस म्हणून ते जास्त एन्जॉय करतो. त्यामुळे कलाकार, मंडळं आणि प्रेक्षक यांचा हा वैयक्तिक प्रश्न आहे. मी स्वतःही दहीहंडी फोडली आहे. तो उत्साह, तिथलं वातावरण मला खूप आवडतं. त्यामुळे मला जर कोणी बोलावलं तर मी आनंदाने जाईन.

-मानसी नाईक, अभिनेत्री

न पटणारं

कलाकारांशिवाय दहीहंडी करण्यामागचं नेमकं कारण काय आहे हे आधी बघणं महत्वाचं आहे. त्यामागची कारणं पटण्याजोगी असतील तर हरकत नाही. पण मुळात या सणांच्या निमित्ताने आम्हाला प्रेक्षकांशी संवाद साधण्याची संधी मिळते. त्यांच्यातलंच एक होण्याची संधी मिळते. अशा वेळी जर अशा काही नियमांमुळे आम्हाला त्याचा भाग होता येणार नसेल तर ते मात्र न पटणारं आहे. आम्ही कुठे जायचं हा आमचा वैयक्तिक प्रश्न आहे. आमच्यामुळे गर्दी होते हे खरं असलं तरी प्रत्येकाच्या सुरक्षिततेची काळजीही घेतली जात असते. त्यामुळे आम्ही हंड्यांना जाण्यामागे कोणाची काही हरकत नसावी असं मला वाटतं.

- नेहा पेंडसे, अभिनेत्री