मुंबई टाइम्स टीम
करोनाचा धोका दिवसेंदिवस वाढत असून, त्यामुळे मुंबई-महाराष्ट्रात भीतीचं वातावरण तयार झालं आहे. कलाकारांनीही करोनाचा चांगलाच धसका घेतला आहे. दरवर्षी प्रेक्षकांचं लक्ष लागून राहणारी मराठी कलाकारांची होणारी होळी यंदा साजरी होणार नाहीय. बॉलिवूड कलाकारांनीही या वर्षी होळी सेलिब्रेशन न करण्याचा निर्णय घेतला आहे.
करोनामुळे होळी न खेळण्याचं आवाहन पंतप्रधानांनी नुकतंच केलं होतं. त्या पार्श्वभूमीवर हा निर्णय घेण्यात आल्याचं सांगण्यात येतंय. अभिनेते जयवंत वाडकर यांनी सोशल मीडियावर एक व्हिडीओ पोस्ट करत, यंदा होळी सेलिब्रेशन रद्द करण्याचा निर्णय घेण्यात आल्याची माहिती दिली. 'पंतप्रधान नरेंद्र मोदी यांनी यावर्षी करोनामुळे होळी न खेळण्याचं आवाहन केलं होतं. त्याला प्रतिसाद देत आम्ही मराठी कलाकारांचं होळी सेलिब्रेशन रद्द करत आहोत. रंगांच्या माध्यमातून करोना व्हायरस पसरु शकतो अशी भीती आहे. करोना फक्त माणसांकडून होणाऱ्या संसर्गातून किंवा खाण्याच्या पदार्थातून होत नाही, तर चीनमधून ज्या वस्तू येत आहेत त्यातूनही करोनाचा संसर्ग होण्याची भीती आहे. या पार्श्वभूमीवर खबरदारी म्हणून आम्ही या वर्षी होळी खेळणार नाही' असं वाडकर यांनी स्पष्ट केलं आहे. बॉलिवूडमध्येही होळीचा दांडगा उत्साह पाहायला मिळतो. पण, करोनामुळे यंदा बॉलिवूड सेलिब्रिटींनीही होळीच्या सेलिब्रेशनपासून लांबच राहण्याचा निर्णय घेतल्याचं कळतंय.