दिलीप कुमार यांची प्रकृती स्थिर

संजय मिश्रा । नवभारतटाइम्स.कॉम

अभिनेते दिलीप कुमार यांची प्रकृती स्थिर आहे. किडनीच्या त्रासामुळे त्यांना आयसीयूमध्ये ठेवण्यात आलं आहे. हळूहळू त्यांची तब्येत सुधारत आहे. आज दुपारी त्यांनी हलकं जेवण घेतलं. किमान आठवडाभर त्यांना रुग्णालयात ठेवावं लागणार आहे, अशी माहिती दिलीप कुमार यांची पुतणी शाहीन अहमद हिने दिली आहे. 'युसूफ अंकलबद्दल जी चुकीची माहिती पसरवली जात आहे त्यावर विश्वास ठेऊ नका', असे ट्विटही शाहीनने केले आहे.

शाहीनने 'नवभारत टाइम्स डॉट कॉम'ला दिलीप कुमार यांच्या तब्येतीबाबत विस्तृत माहिती दिली. योग्य प्रमाणात पाणी न प्यायल्याने त्यांना डिहायड्रेशन झालं. त्यामुळे किडनीवर ताण येऊन त्यांना अधिक त्रास होऊ लागला. त्यानंतर त्यांना लीलावती रुग्णालयात दाखल करण्यात आलं. सर्वात आधी शरिरातील पाण्याचं प्रमाण पूर्ववत करण्याचा डॉक्टरांचा प्रयत्न आहे, असे शाहीनने नमूद केले. डॉ. जलील पारकर नव्हे डॉ. नितिन गोखले अंकलवर उपचार करत आहेत, असेही तिने स्पष्ट केले.

दिलीप अंकलचं वय ९४ वर्षे आहे. अर्थातच वार्धक्यामुळे त्यांचं लहानसं दुखणं असलं तरी ते आमची चिंता वाढवणारं असतं. म्हणूनच उपचारांत कोणतीही कसर राहू नये म्हणून त्यांना आयसीयूत ठेवण्यात आलं आहे. आधीपेक्षा आता त्यांच्या तब्येतीत सुधारणा आहे. आज बेडमधून उठून ते खुर्चीत बसले व त्यांनी हलकं जेवण घेतलं. भोपळ्याची भाजी, कढी आणि दोन चपात्या त्यांनी खाल्ल्या, असे शाहीन म्हणाली.

आणखी दोन दिवस त्यांना आयसीयूत ठेवावे लागेल. त्यानंतर सामान्य विभागात त्यांना शिफ्ट केलं जाईल. साधारण आठवडाभर त्यांना रुग्णालयात ठेवावं लागेल, असेही शाहीनने स्पष्ट केले.

Yusuf uncle right now in Leelavati. Please do not believe people who are seeking publicity via a vis wrong information. pic.twitter.com/ocVY2mfwFk — Shaheen (@ShhaheenAhmeed) August 4, 2017